DF-ip siunnersuutini uteqqikkaa: Kalaallit Nunaanni qimaasut ineqarfissaannik kissaateqartoq
Nunamut qimaasutut isernissamik qinnuteqartut Danmarkip avataanut inissinniarlugit Kalaallit Nunaata tungaanut isiginiarluni, Dansk Folkepartimi siulittaasoq oqarpoq. Ministerip siunnersuut itigartippaa.
Dansk Folkepartip aasaanerani ataatsimiinnerannut atatillugu politikkikkut siunnersuutit arlallit pingasunngornermi saqqummiunneqarput.
Qimaasutut nunamut isernissamik qinnuteqartut Danmarkimut pinatik nunami allami ineqarfinniittassasut, partii ilaatigut kissaateqarpoq.
Tassunga atatillugu siulittaasiq Morten Messerschmidt, Kalaallit Nunaanni qimaasunut ineqarfeqarnissaanik isumassarsiaqarpoq.
TV2 taama allaaserisaqarpoq, tassanilu Dansk Folkepartip sumi qimaasunut ineqarfeqassanersoq apeqqutit Morten Messerschmidtip akissuteqarfigai.
Qimaasut Kangilinnguanut inissinniaraluaraat
- Ungasinngitsoq eqqarsaatigalugu Kalaallit Nunaata tungaanut isigisinnaavugut. Danmarkimit nuunneqarnissaat pingaaruteqarpoq, Morten Messerschmidt, TV2-mut taama oqarpoq.
Ungasinnerusoq eqqarsaatigalugu nunamut allamut ”attartornermut isumaqatigiissusiortoqassasoq, partiimi siulittaasup nangilluni oqaatigaa.
Dansk Folkeparti siornatigut assingusumik arlaleriarluni siunnersuuteqartarpoq – kingullermik 2020-mi. Tassanilu Kangilinnguani – Arsuup eqqaani – qimaasutut nunamut isernissamut qinnuteqartunik inissiisoqartarnissaa siunnersuutigineqarpoq.
Taamanikkullu siunnersuut danskit integrationsministeriannit itigartinneqarpoq.
Qimaasunik tigusisoqarnissaa Kalaallit Nunaata nammineq aalajangigassarigaa, danskillu naalakkersuisui ”nunasiaatilittut” pillutik aalajangiisussaanngitsut, ministeri Kaare Dybvad Bek (Soc.) TV2-mut oqarpoq.