DF: Milliardit affaat isumaginninnermut immikkoortinneqarlik
Søren Espersenip Danmarkip nunatsinnut tapiissutigisartagaasa ilaat 500 million koruunit isumaginninnermi ajornartorsiutit pinaveersaartinnissaannut immikkut aningaasaliissutigineqarnissaat piumasaraa.
DF taama piumasaqarpoq MIPI-p meeqqat piitsut pillugit nalunaaruteqareertorlu.
Mamiatsaatigilluinnarpara Namminersornerullutik Oqartussat danskit naalakkersuisuinut ikioqqullutik pisimanngimmata. Namminersornerullutik Oqartussat isumagininnermi ajornartorsiutit namminneerlutik tamaasa isumagisinnaanngilaat. Ajornartorsiutit ukiuni kingullerni ajorseriartuinnarput, Søren Espersen Dansk Folkepartiimeersoq KNR-ip radioavisianut oqarpoq.
Espersenilu naalakkersuisunut siunnersuuteqarluni kingumut piumasaqaqqippoq nunatsinnut tapiissutit ilaat 500 millioner koruunit isumagininnermut immikkut atugassanngorlugit tapiissutigineqartariaqartut.
- Aningaasanut inatsisissaq oqaluuserisussaavarput siunnersuutikkullu tamanna piumasarissavara, Søren Espersen oqarpoq.
Dansk Folkeparti ukiup affaata matuma siorna piumasaqarpoq tapiissutit ilaat isumaginninnermi ajornartorsiutit pinaveersaartinnissaannut immikkut aningaasaliisoqartariaqartoq, siunnersuulli naalakkersuisunit akuerineqanngilaq.