Disko Linep takornariartaataani ikuallattoqarneranit angalaneq unitsinneqartoq
Takornariartaammi Najaaraq Ittummi Disko Linemit pigineqartumi ikuallattoqarmat, sermeq iigartartumut Eqimut angalaneq unitsinneqarsimavoq. Disko Linemi pisortaq, Mike Kruse uppernarsaavoq.
Inuttat pingasunngornermi isumannaallisaanermik suliassaq sungiusarsimasartik suliarimmassuk, ilaasut sermimut iigartartumut Eqimut puigunaatsumik angalanissaminnik qilanaarsimasut, pisumi eqqissisimasumik silatusaartumillu qisuariarput, Disko Linemi pisortaq, Mike Kruse, Sermitsiaq.AG-mut oqaluttuarpoq.
- Ilaasut isumannaatsuunissaat pingaarnerutittuaannarparput, angallammilu inuttatta pisoq suliarilluarpaat.
Ilulissanit aallarnermit akunnerup affaata missaa qaangiuttoq ikuallalerpoq, umiarsuaq 60-inik ilaasoqartoq Oqaatsut eqqaaniinnerani.
Amerlanerit angalaartut
Angallammi ikkuffimmi pujuliortoqarneranik aallartippoq, taannalu annertunngitsumik ikuallalerpoq.
- Inuttat sukkasuumik qisuariarput, ilaasullu tamarmik umiarsuup aquanukarteriarlugit ikuallattoq sukkasuumik qamippaat, pisortaq oqaluttuarpoq.
Kingorna umiarsuaq Ilulissanut uterpoq, ilaasullu amerlanerpaartaat angallatinut allanut ikineqarput, taamaalillutik Eqimut angalanissamik pilersaarut malillugu angalaniassammata.
Imarsiornermik Qullersaqarfik oqaloqatigigaat
Ilaasut 56-it aallarput, naak angallat ikiallattoqareernerata kingorna utertariaqalersimagaluartoq.
- Ikuallanneranut suna pissutaanersoq misissoqqaartinnagu angalaneq ingerlatiinnarusunngilarput. Kabelinik taarsersuileruttorpugut, pisoq pillugu nalunaarusiorniarluta Imarsiornermik Qullersaqarfik aamma oqaloqatigaarput, pisortaq oqaluttuarpoq.