DK-mi ilinniartunik immikkoortitsineq: Politikkikkut iliuuseqartoqarnissaanik pisortaq ujartuivoq

Kalaallit Danmarkimi ilinniartut pillugit nalunaarusiami nutaami, aperineqartunit akissuteqartut tallimararterutaat qaammatini aqqaneq-marlunni kingullerni nuanninngitsumik immikkoortinneqarnermik misigisaqarsimapput, assersuutigalugu suliffimmik misiliinermut qinnuteqarnermi imaluunniit suliffissarsiornermi imaluunniit eqimattakkuutaarluni sulinermut peqataatinneqannginneq misigalugu.

Kalaallit assigiimmik pineqartarnissaat ilinniartunut, kisianni aamma kalaallit sinnerinut Danmarkimiittunut atuuttoq, Inuit pisinnaatitaaffii pillugit Ilisimatusarfimmi pisortap, Louise Holckip oqaatigaa. Danskit naalakkersuisuisa kalaallit Danmarkimiittut assigiimmik pineqartarnissaannut qulakkeerinnissallutik iliuuseqarnerusariaqartut, taanna isumaqarpoq.

Inuit pisinnaatitaaffii pillugit Ilisimatusarfiup inassuteqaataasa ilagaat ”Danmarkimi naalakkersuisut naalagaaffimmi allattoqarfimmik, kalaallit Danmarkimiittut assigiimmik pineqarnissaannik suliniutaanut ataqatigiissaarisumik qulakkeerinnittumik pilersitsissasoq”.

Nunat sanilit qiviarneqassasut

Allaffeqarfik taamaattoq qanoq iliussanersoq aamma qanoq sunniuteqassanersoq, Sermitsiaq.AG-p pisortamut apeqqutigaa.

- Kalaallit Danmarkimiittut assigiimmik pineqarnissaannut ataqatigiissaakkamik iliuuseqarnissap qulakkeernissaanik pisariaqartitsisoqarpoq, suliassaqarfinni arlalinni ilungersunartoqarnera pissutigalugu. Ataatsimut iliuusissamik suliaqaraanni kalaallinut Danmarkimiittunut assigiimmik pinninnissamut iliuusissamik pitsaanerusumik suliaqartoqarsinnaasoq isumaqarpugut, Louise Holck oqarpoq.

Norgemi, Sverigemi aamma Finlandimi naalagaaffiup tungaani ataqatigiissaarisumik immikkoortortaqarfinnik suliaqartoqartoq, taassuma oqaatigaa, taamaalilluni nunap inoqqaavisa assigiimmik pineqarnissaat qulakkeerneqartarpoq.

Nunap inoqqaavinut immikkut pisussaaffeqartut

Nunap inoqqaavinut immikkut pisussaaffeqartoqarnerani ajornartorsiortoqartoq, pisortaq isumaqarpoq.

- Kalaallinut Danmarkimiittunut allannguititsillunilu pissutsinik nukittunerulersitsissasoq, kiisalu Danmarkip kalaallit assigiimmik pineqarnissaannut tunngatillugu ILO-mi aalajangersakkanut naammassinninneranik qulakkeerinnissasoq isumaqarpugut, taanna oqarpoq.

Danmark ILO-mi aalajangersakkanut ilaavoq, taamaattumillu nunap inoqqaavisa assigiimmik pineqarnissaannut naammassinninnissamik pisussaaffeqarpoq.

- Danmarkimit nunarsuarmi angalatilluta nunap inoqqaavisa pisinnaatitaaffii pillugit nunani siuttutut saqqummeraangatta – nunagisatsinni naammaginartumik iliuuseqarnerluta immitsinnut aperissaagut. Naammaginartumik iliuuseqanngilagut, ajornartorsiullu naammaginartumik sammineqanngilaq, Louise Holck oqarpoq.

Amerlasuut ILO-mut ilisimanninngitsut

Nalunaarusiamik immikkoortitsisarneq pillugu ajornartorsiutit sammineqarnerisa annertusineqarsinnaasut, taanna isumaqarpoq. Aammalu danskit pisussaaffimminnut ilisimasaqarnerulernissaannut.

- Qallunaat amerlasuut nunap inoqqaavinut immikkut pisussaaffeqartoqarnera ilisimanngilaa. Nalunaarusiap matuma ajornartorsiutip maluginiaqqunissaanut pissutissatsialaavoq, nalunaarusiamilu nakkarsaalluni pissusilersortarnermik, nakkarsaalluni oqaaseqartoqartarneranik, isummereertarnermik aamma peqataalersitsiniartarnerup appasinneranik ajornartorsiuteqartoqarneranik naqissusiivoq. Tamatuma naqissuserneqarnera pitsaasuuvoq, naak tupaallannanngikkaluartoq, pisortaq oqaluttuarpoq.