DK-mi kalaallinut atugarliortunut aningaasat agguagassat qinnuteqarfigineqarsinnaanngorput
Aningaasat agguagassat 25,5 millioner koruuniusut, Danmarkimi kalaallit inuuniarnerminni ajornartorsiortut atugaannik pitsanngorsaasussat siullermeersumik ukioq manna qinnguteqarfigineqarsinnaapput.
Aningaasanut agguagassanngorlugit immikkoortitanut kalaallinut Danmarkimi najugaqartunut iluaqutaasussat maanna qinnuteqarfigineqasinnaapput. Aaja Chemnitz Larsenip (IA) kaammattuutigaa nalunaarut avitseqatigiiffiussasoq, aningaasat Danmarkimi kalaallit atugarliortut atugaannik pitsanngorsaanissamut atorneqarniassammata.
Aningaasanik immikkoortitanik qinnuteqarsinnaanermi siunertarineqarpoq, kalaallit atugarliortut immikkut pisariaqartitallit annertuunillu ajornartorsiutillit inuuniarneranni piginnaasaqarluartunit sullinneqartarnerisa taperserneqarnissaat. Aningaasat qinnuteqarfigineqarsinnaasut 25,5 millioner koruuniupput, ukullu 2024-p tungaanut atuuttussanngortinneqarsimallutik.
Kommunit, peqatigiiffiit namminneq piumassutsiminnik ikiuuttartut kattuffiillu, assersuutigalugu aningaasarsiaqartitsinissamut, siunnersorteqarnermut, angallassinernut sammisassaqartitsinernullu atugassanik qinnuteqarsinnaapput.
Qinnuteqarnissamut ulloq 11. maj killigitinneqarpoq.
Ataasiakkaanut iluaqutaassasut
Folketingimi ilaasortap Aaja Chemnitz Larsenip (IA) neriuutiginerarpaa aningaasat atugarliortunut iluaqutaajumaartut.
- Aningaasat ataasiakkaanut iluaqutaallutik atorneqarnissaannut uummammit pisumik neriuuteqarpunga. Pissutsit mumisissavagut neriuppungalu aningaasat ukua ilorraap tungaanut saatitsiumaartut, Aaja Facebookikkut allappoq.
Ilaatigut atornerluisut katsorsartinnerannut kalaallinullu ilaqutariinnut Danmarkimiittunut qajannartumik inissisimasunut ikiorsiineq naammanneq ajormat siornatigut aningaasat Folketingimi isumaginninnernut tunngasunut atugassanik isumaqatigiinniarnerni illikartittarpagut, Aaja Chemnitz Larsen saqqummiussamini allappoq.
- Maannali pitsanngoriartitsinissamut ilungersoqataarusuppunga, Aaja allappoq, nangillunilu:
Attavitit avitseqatigikkit – imaassinnaavoq ikiorneqartussanut apuunnissaanut ikiuuttusi.
Qinnuteqarsimasut 2022-mi juunip aallartinnerani akissutisinissartik naatsorsuutigisinnaavaat.