Doris aamma Sara, Helle naammagisimaarpaat
Nunatsinnit folketingimut qinikkatta tamarmik arnaq Danmarkimi statsminitserinngortoq siullerpaa Helle Thorning-Schmidt ammaanersiorluni oqalugiarmat naammagisimaarinnipput.
Statsminister Helle Thorning-Schmidt Folketingi ammarlugu oqalugiaqqaalermat saamerliit ersaattaapput. Folketingip siulittaasuatut qinigaarlaaq Mogens Lykketoft akuliutinngilaq, naak Folketingimi ileqqoreqqusat naapertorlugit inimi ersaattaattoqaqqusaanngikkaluartoq.
Allatut oqaatigalugu piffiit nutaat aallartipput, ulloqeqqata siorna folketingimi piffissaq nutaaq ammaanersiorneqarmat. Naalakkersuisut nikinnerat nuannaarutaanera aamma nunatsinni folketingimut qinikkatsinnit IA'meersumit Sara Olsvig aamma Siumukkunneersumit Doris Jakobsenimit ersersinneqarpoq. Tamarmik maluginiarpaat statsministerinngortup Nunatsinni tunngaviusumik inatsiseqalernissaq tapersersormagu.
- Savalimmiu aamma Kalaallit Nunaat inuiaqatigiit namminneq demokratiskiusumik tunngaveqarnissamik kissaataat paasinarpoq. Naalakkersuisut Savalimmiuni aamma Kalaallit Nunaanni namminneq tunngaviusumik inatsiseqalernissamik kissaat inuttaasut oqallisigisaat ataqqivaat. Taamaattoq pingaartipparput Savalimmiuni aamma Kalaallit Nunaanni tunngaviusumik inatsiseqalernissaq naalagaaffeqatigiinnerup pisinnaatitaaffiata iluaniissasoq, Savalimmiut aamma Kalaallit Nunaat uagut naalagaaffitsinni ilaagallartillugit, Helle Thorning-Schmidt ammaanermi akunnerup ataatsip missaanik sivisussuseqartumi oqalugiarnermini oqarpoq.
- Nuanneqaaq statsiministerip akuerimmagu Kalaallit Nunaat aamma Savalimmiut imminnut isigalutik ineriartormata. Ineriartorneq allornikkaarlugit ingerlattariaqartoq, Sara Olsvig oqarpoq.
Doris Jakobsenip maluginiarpaa naalakkersuisut nutaat issittoq pillugu isiginninniarnerusut.
- Danmarkimi statsministeri arnaq siullerpaaq oqalugiartoq tusaallugu nuanneqaaq, taassuma tikkuarpaa naalakkersuisunngortut issittumi qanoq iliuuseqarnissaq nukittorsarneqarnissaanik kissaat. Issittup saqqumilaartinniarneqarnera eqqortuuvoq, Doris Jakobsen oqarpoq.
Folketingimi ammaanersiorneq inatsisartut siulittaasuata Josef Motzfeldtip malinnaaffigaa. Naalakkersuisut siulittaasuat Kuupik Kleist peqataasinnaanani nalunaarsimavoq.