Doris eqqartuussisunik suligasuartussanik piumasaqarpoq

IA qallunaat naalakkersuisuisa aningaasanut inatsisissatut siunnersuutaannut akerliulluni taasiniartoq Siumut isumaqataalluni taasiniarpoq, arlallilli sammineqarnissaat piumasaralugu.
Folketingimut ilaasortap Doris Jakobsenip, Siumut, siullerpaamik tikkuarpaa Kalaallit Nunaata Eqqartuussiviani suliassarpassuit utaqqisut. Eqqartuussisut amigaatigineqarput.
– Siullermik tikkuarusuppakka Kalaallit Nunaanni eqqartuussivinni suliassarpassuit utaqqisut.
Eqqartuussisut amigaatigineqarput, suliassat maanna 8000-t missaanniipput eqqartuussivikkoortinneqartussat, Doris Jakobsen tikkuaavoq naalakkersuisullu kaammattorlugit tamanna sammeqqullugu.
– Naalakkersuisut kajumissaassavakka tamatumani nassaarsiullaqqitsigissasut, pinerluuteqarsimasunut inissiisarfinnut utaqqisorpassuarnik ajornartorsiut aaqqinneqarmat, Doris Jakobsen Folketingip oqaluttarfianit oqarpoq.
Atuaruk: "IA: Qallunaat aningaasanut inatsisissatut siunnersuutaannut naagga"
Atugarliortunut 4 millioner koruuninik piumasaqarpoq
Doris Jakobsenip Folketingi oqaluttuuppaa qanittukkut kalaallit illuutaat arlallit pulaarsimallugit, tamarmillu assigiissumik paasissutissiisut kalaallit inuttut atugarliortut sullinnerat ajornakusoortoq, pissutigalugu qallunaatut innuttaassusillit akulerunnissamik iluamik neqerooruteqanngimmata.
– Suliap tamassuma siunissami qulakkeerneqarnissaanut aningaasanut inatsisikkut piffissamut sivisuumut qularnaatsumillu 4 millioner koruuninik aningaasaliisoqarnissaa pisariaqartinneqarpoq, Siumumeersoq naalakkersuisunut tikkuaavoq erseqqissarlugulu maanna tamakkuninnga sullissineq Danmarkimi illoqarfinni anginerni tallimani taamaallaat ajunngitsumik ingerlasoq.
– Nuna tamakkerlugu periuseq nutaaq illoqarfinnut anginerpaanut tallimanut killilerneqarsimavoq. Taamaattumik kalaallit Danmarkimiittut affaannai sullinneqarput, Doris Jakobsen oqarpoq.
Uranimik qineqqusaarunni piviusunngortinniarpaa
Politikerip Siumumeersup aamma Folketingi oqaluttuuppaa Siumup qineqqusaarutini maanna piviusunngortinniarai.
– Siumup qineqqusaarutigisimavaa uranimut saniatigut tunisassianut akuersaannginnerup atorunnaarsinneqarnissaa, uranilu Kalaallit Nunaannut Danmarkimullu aningaasarsiutinngortinniarlugu. Tamanna ingerlanniarparput, Doris Jakobsen oqarpoq erseqqissarlugulu tamatumani nunani tamalaani nakkutilliisoqarnissaa inissinneqassasoq.
– Allannguulli tamanna piviusunngortissanngilarput aatsitassarsioqatigiiffiit uppernarsaanissaasa tungaanut, atortussat uran-imik akullit nunamit aallarussinnaallugit toqqissisimanarluinnartumik, Siumut tunuliaqutaralugu folketingimut ilaasortaq oqarpoq.
Aamma atuaruk: "Doris oqaluttarfimmit imatut oqarpoq"