Dorisip CIA'p naalliutsitsisarsimaneri aalassaatigaa
Folketingimut ilaasortaq Doris Jakobsen, Siumut Europa-Parlamentetip CIA'p unioqqutitsilluni tigusanik timmisartuussisarsimanerinik tusarniaatitsineq najorpaa
- Inuit pisinnaatitaaffiinik unioqqutitsisumik iliuuseqartarnerit akuerisinnaanngilagut. Unioqqutitsisoqartarsimappat paasisariaqarparput taamatullu pisoqaqqinnginnissaa isumannaarlugu.
Taama oqarpoq Siumut sinnerlugu folketingimut ilaasortaq Doris Jakobsen, marlunngornermi Europa-Parlamentip CIA'p tigusanik ingerlassimaneri tusarniaassutigimmassuk.
Tusarniaanerup nalaani parlamentip illorsuani Bruxellesimi ingerlanneqartumi, erseqqissumik takutinneqarpoq tigusat qanoq naalliutsinneqartarsimanerat.
- Naalliutsitseriaatsit atorneqarsimasut takutinneqarmata isersimasut tupaallassimaqalutik qisuariarput uanga aamma nammineq tupaallaqqaqaanga, Doris Jakobsen Sermitsiaq.AG'mut oqarpoq.
Amiilaarnartumik naalliutsitsisut
Amerikamiu pinerluuteqartartumut Abu Zubaydanimut eqqartuussissuserisoq Amanda Jacobsen, tusarniaanerup nalaani oqaluttuarpoq sullitani 41'nik ukiulik CIA'imit naalliutsitaanermi kingorna nammineq pisussinnaajunnaangajavissimasoq.
Abu Zubaydan 2002mi Parkistanimi tigusarineqarpoq. Pinerluuteqartarsimasutut pasisaq ilaatigut 83'eriarluni killisiorneqartarsimavoq, waterboarding atorlugu tassa naalliutsitseriaat imaattoq, inummik qilersorsimasumik puaanut imermik immiiutigaluni oqalutsitsiniaat. Zubaydan mattarlugu killisiortarsimavaat ullut unnuallu arlallit sinitsittaalillugu aammalu karsimut qernertumut anginngitsumut ikisarlugu oqalutsinniartarsimavaat CIA'p Al-Qaeda pillugu paasissutissanik pissarsiniarluni.
- Uagut nunatsinni unioqqutitsinerit taamaattut akuerisinnaanngilluinnarpagut unioqqutitsinerit taama inuppalaanngitsigisut akuerisinnaanngilluinnarpagut. Inuit pinerluuteqarsimasuuppata pinerluuteqarsimanngikkaluarpataluunniit, eqqartuussiviit aqqutigalugit naapertuuttumik pineqartariaqarput, Doris Jakobsen Bruxellesimi tusarniaanerup kingorna oqarpoq.
- Taamaattumik Kalaallit Nunaat aamma Danmark eqqumanerusariaqarput. Oqaatiginngitsoorsinnaanngilara nunatsinnit qallunaanillu maani peqataasoqannginnera amigaataammat, Doris Jakobsen Sermitsiaq.AG'mut oqarpoq.