Dorisip oqaaseqaqqaataa
CO2-mik aniatitsinerulernissaq, Thulebasemi misissuisoqarnissaa kalaaliaqqallu Danmarkiliartinneqarsimasut utoqqatserfigineqarnissaat piumasarai. Doris Jakobsenip Folketingimi oqaaseqaqqaarnermini ilaatigut tamakku eqqartorpai.
Siumup folketingimi ilaasortaatitaa Doris Jakobsen sisamanngormat unnukkut Folketingip oqaluttarfianiit oqaaseqaqqaarnermini ileqqutoqqat malillugit 25 ørenik tuniorarneqarpoq. Doris Jakobsenip oqaaseqarnini aallarnerlugu imminut ilisaritillunilu Lars-Emil Johansenimut taartaagallarnerarpoq.
Folketingimi ilaasortaqatimisut Inuit Ataqatigiinnersutut Doris Jakobsenip aamma silap pissusaa pillugu isumaqatigiinniarnerit ingerlasut aallarniutigai, tassani Kalaallit Nunaat CO2-mik aniatitsinerunissaminik piumasaqarmat.
– Suliffissuit ingerlateriikkagut, aalisarneq takornariaqarnerlu annertusartariaqarpagut, umiarsuarnik timmisartunilllu nutaanik pissaartortariaqarpugut, suliffissuit illutaannik nutaanik, hotelinik mittarfinnillu sanaartortariaqarpugut. Tamakkulu Kalaallit Nunaata CO2-mik aniatitassaa taama annikitsigisoq atorlugu naammassineqarsinnaanngillat, Doris Jakobsen oqaaseqarnermini ilaatigut taamatut oqarpoq.
Oqalugiaataa talerpiup tungaaniit aaneqarsinnaavoq.