Dorph: Suleqatigiissaagut
Kommunerujussuugaluartoq, ilami nunarsuarmi annersaalluni, Qaasuitsup Kommuniani borgmesterip nutaap Ole Dorphip, Siumut, neriorsuutigaa qanittuunermik periuseq pingaartinneqassasoq: Immitsinnut susassareqatigiissaagut, taanna oqarpoq
- Qinigaasunut uagutsinnut kissaatigaara innuttaasut pissutigalugit suleqatigiinnissamik piumassuseqassasugut, neriorsuissaangalu sapinngisara tamaat tamanna anguniassallugu. Anguniagaraaralu kommunalbestyrelsip sulinera pillugu innuttaasut tamakkiisumik paasissutissinneqartassasut. Nalunngilluarparput kommunerput angisuujusoq. Immitsinnut ungaseqaagut, taamaakkaluartorli qanilaarnerussaagut immitsinnullu susassareqatigiilluta. Taamaasilluta angusaqarnerujussuussaagut. Suliassarpassuaqarpugut, suleqatigiinnitsigulli angusaqartorujussuusinnaavugut. Innuttaasut pillugit.
Taamatut ilaatigut oqarpoq Ole Dorph (S), arfininngormat ullaap tungaani Kulturip Illorsuani Sermermiuni borgmesterinngortinneqarnerminut atatillugu kommunalbestyrelsimut nutaamut oqalugiarnermini.
Kommunalbestyrelsimut sivisunerpaamik ilaasortaasimasup Bernhard Olsenip pisarnertut ataatsimiinneq ammarpaa, ataatsimiinnerlu Ilulissani innuttaasunit malinnaaffigineqarpoq, Ole Dorphip borgmesterinngortinneqarnissaanik malinnaajartortunit.
Tupaallannanngitsumik Siumut Atassullu katillugit 16-inik ilaasortallit suleqatigiilerput. Tamarmik Ole Dorph borgmesteritut toqqarpaat, Inuit Ataqatigiit taaseqataanngitsut.
Ilaasortanit 21-nit Siumut amerlanerussuteqarluarpoq 13-inik ilaasortaatitaqarluni, Inuit ataqatigiit tallimanik ilaasortaatitaqarput Atassullu pingasunik ilaasortaatitaqarluni.
Jess Svane borgmesterip tulliatut siullertut Ane Hansenilu borgmesterip tulliata aappaatut toqqarneqarput.