tikeraarneq
Dronning Elizabethip Donald Trump tikeraaqquniaraa
Trumpip Tuluit Nunaannu tikeraarnissaa oqallisaangaatsialissasoq The Sunday Times allappoq
Amerikami præsidentinngortussaq Donald Trump Dronning Elizabethip tikeraaqqullugu qaaqqunissaa Tuluit Nunaata Amerikallu attaveqatigiinnerannut aserujaallisitsissasoq The Sundat Times allaaserisaqarpoq.
Ministerit marluk atorfilittallu Downing Streetimit paasissutissat aviisip innersuussiffigai.
Aappaagu junimi julimiluunniit tikeraartoqarnissaanut ullulerneqassasoq Trumpip atorfilittaasa tuluillu atorfilittaasa isumaqatigiissutigissagaat tusagaqarfiup paasissutissiissutigaa.
Premieministerip Theresa Maysip EU-mit aninissaq Tuluit Nunaata nunanik allanik suleqateqarniarnera allannguutaassammat Amerika suleqatiginera "immikkuullarissoq" pitsanngortikkusuppaa.
Trumpillumi præsidentimut qinigaaqqammerluni tuluit premieministeriat attaveqarfiigaa Amerikap Tuluit Nunaatalu suleqatigiinnerat "immikkuullarissoq" ineriartortikkumallugu.
Theresa Mayillu piaartumik tikeraarnissaa qaaqqullugu.
Amerikami præsidentinngorumaartussap Tuluit Nunaata EU-mit aninissaanut suliniuteqartut Nigel Farage naapereerpaa. Taamatullu pisoqarnera Theresa Mayimut ataqqinninnginnerusoq politikkikkut oqaaseqartartut inernilerlugu.
Taakku naapinnerat Trumpip angerlarsimaffiani Manhattanimi New Yorkimi pivoq. Nigel Faragelu tuluit politikkeriini siullersaalluni Amerikami præsidentinngortussaq naapillugu.
Nigel Faragep Donald Trump præsidentimut qineqqusaarmat tapersersorpaa. Qineqqusaarneranilu arlaleriarluni peqataalluni.
/ritzau/Reuters