Dronning Margrethe tv-kkut oqalugiassaaq

Dronning Margrethe Fredensborg Slot-iminngaanniit danskit innuttaasuinut coronavirusip siaruaannera pillugu oqalugiassasoq, kunngikkormiut tusagassiutinut nalunaaruteqarput.

Dronningip qallunaanut oqalugiarnera DR-ip TV2-llu nalunaaqutaq 20.00 toqqaannartumik aallakaatissavaat, kunngikkormiut ilisimatitsipput. Kalaallit Nunaata nalunaaqutaa malillugu tassa nalunaaqutaq 16.00.

Dronning Margrethe Danmarkimi coronavirusip siaruaannera pillugu oqalugiassaaq.

Fredensborg Slottimiit marlunngornermi danskit nalunaaqutaat malillugu 20.00 oqalugiassaaq. Kunngikkormiut taama nalunaaruteqarput.

Coronavirus, Kinami 2019-ip naalernerani paasineqaqqaartoq, Danmarkimi sapaatit akunnerni kingullerni tuniluutipallappoq.

Marlunngornermi inuit 960-it tunillatsissimasutut paasineqarsimasut nalunaarutigineqarput. 82-it napparsimmavinni uninngapput, taakkunannga 18-it peruluttut inaanni uninngatinneqarlutik. Tunillatsissimasut naatsorsorneqarneranni, tunillatsissimasut nalunaarsorneqarsimanngitsut amerlasut, peqqissutsimut ministeri Magnus Heunicke (Soc) siusinnerusukkut ilisimatitsivoq.