Dronningimik naapitsinera: Issuaannakkanik atuinngisaannartoq
Christian Schultz-Lorentzen, Tusagassiorfik Sermitsiaq.AG-p pisortaanerani AG-milu aaqqissuisuuneq, tusagassiortutut sulinerminut atatillugu dronningi arlaleriarluni naapittarsimavaa.
- Dronningi Kalaallit Nunaannut atassuteqarnera pillugu ukiuni 20-ni kingullerni arlalippassuariarlunga apersortarsimavara. Dronningip nuannarinninnera ersarittarpoq. Tamatigut soqutiginartumik. Takorluuerpalulertarpoq. Soorlu ilinniartitsisorilluarsimasatut. Taavalu tupinnaannartumik ilisimasaqarluarpoq. Kalaallit Nunaata piffissami tassani ajornartorsiutaanik nunallu oqaluttuassartaanik.
- Taavalu misigisaqartitsisarpoq, kunngikkormiunik nuannarinnittuugaanni nuannarinninngikkaanniluunniit. Inuk ilisimasalik, issuaannakkanik atuineq ajortoq, namminerpiarli isummani oqaatigisarpai ersarissumik akilluni. Tamanna peqatigalugu tassaavoq inuk killissaqartitsisoq, tamannalu tupinnanngilaq kikkut tamarmik pissarsiffigilaarusummanni. Tunniussisarpoq. Killilimmilli.
- Ukiorpassuit matuma siornatigut kultoorip illorsuanut Katuamut takornariaqqaarnerani malinnaavigaara. Tusagassiortut arlaliuvugut, angalaarunneqareerneratalu kingorna tusarusupparput kultorip illorsua qanoq isumaqarfigineraa. Apersorneqarusunngilaq. Taamani ceremonimesteriata Christian Eugen-Olsenip peqqusersorpasittumik isimmiilluni oqarfigaatigut dronningi inimit kaffesorfimminit kaagisorfimminillu anippat aperiniarsinnaagipput. Misilissinnaavarpummi. Dronningip uagut tusagassiortut saneqqutilermatigut ceremonimesterip pisunnini kigaallatsilaarpaa aperisinnaaniassagatta. Dronningip isai kamaammerpallapput, naatsuinnarmillu akilluta qimappaatigut.
- Kultorip illorsuanit aniartorlutik Eugen-Olsen – maanna ingerlaaqatigiinni kingullersanngorsimasoq - tunummut qiviarpoq inussaminillu qungatsimigut pilatsittutut usserluni. Naveersittussanngorpoq. Suut tamarmik pissusissamisut ingerlassapput. Prins Henriup pissusaanut assigunngeqisumik, taassuma allamut saariataarneq nuannarisaqaa. Immaqa tusaamasaanersaavoq paarsisuni annilaarteqalugit Christianiamut pulaarmat.
- Qularutissaanngilarli dronningi saneqqutassaanngitsumik immikkut inissisimaffeqaannanngitsoq, aammattaarli minguitsumik inuppalaassuseqartoq, uannut puigungassaanngitsumik misigisaqartitsisimasumik.
Aviisi Dronning Margrethe pillugu tapiliussaq uani atuarsinnaavat - akeqanngilaq