Efterskolertunut sipaarut peerneqartoq
Nunanit allanit qimaasunut kalaallinullu Danmarkimi najugaqartunut inuunermi ilungersuuteqartunut, efterskolelernermi aningaasat ikiorsiissutit 28.000 koruuninik sipaarutissartallit ukiut aappassaa sipaarniarfigineqarput.
Efterskoleforeningen qimaasunut, atuartunut allamiunit kingoqqisunut, kalaallinullu Danmarkimi najugaqartunut inuuniarnermikkut ilungersuuteqartunut 210-nut 2019-imi efterskolernissamut aningaasanik ikiorsiissuteqarpoq. Efterskolernermut aningaasartuutit aningaasanik ikiorsiissummik tunineqarnikkut 28.000 koruuninik ilanngarneqartarput.
Ukioq manna atuartut 65-it taama ikiorneqarput.
Politiken.dk taama allappoq.
Efterskoleforeningen isumaqarpoq aningaasaliinikkut ikiorsiissutinik pisartut ikinnerulernerat, atuartut assigiiaannginnerunissaannut killiliisoq.
- Efterskoleni assigiinngisitaartunik tunuliaqutaqartut ikinnerulernissaat aliasuutigaara. Nuuttut inuiaqatigiinnut akuunerulersinnissaannut suliniutit ingerlassinnaannginnatsigit, aamma angerlarsimaffinnit pissakinnerusuneersut efterskolernissamut periarfissaannik tunisinnaannginnatsigit. Danmarkimi assigiinngisitaartunik tunuliaqutaqartut najugaqarmata, tamanna efterskoleni aamma takuneqarsinnaasariaqaraluarpoq, Torben Vind Rasmussen, Efterskoleforeningenimi siulittaasoq, politiken.dk-mut oqarpoq.
Naalagaaffiup aningaasat agguarsimasai - inuiaqatigiinni ilungersunarnerusumik atugassaqartunut suliniutinut ingerlateqqinneqartartut - ukioq manna ikilisinneqarujussuarsimammata. Aningaasanik akiliutsinneq taakkunanngaanniit aningaasalersorneqartartoq, nutaarsiassaqartitsivik allappoq.
Efterskolet akisupput
Efterskolertoorneq ilaqutariinnut akisusinnaasarpoq. Angajoqqaat ukiumut isertitaat aallaavigalugit efterskolernermi tapiliussap qanoq annertutiginissaa aalajangerneqartarpoq.
Ukiumut isertitat 900.000 koruunit qaangersimappatikkit, 83.000 koruunit akilerneqartarput. Efterskolertitsinermi akiligassaq annikinnerpaaq tassaavoq 55.000 koruunit missaat, tassa ukiumut isertitat 360.000 koruunit ataassimappatikkit.