Eqaluk Høegh sulinngiffeqarnerminit uterpoq
IA-mi politikeri aggustip naanerani Naalakkersuisunit tunuarpoq, Inatsisartuniillu napparsimalluni sulinngiffeqarnissaminik qinnuteqarluni.
Eqaluk Høegh siornatigut meeqqanut, inuusuttunut, ilaqutariinnut inatsisinillu atuutsitsinermut naalakkersuisuuvoq, taamaattorli siorna aggustip naalernerani uippakajaarnini pissutigalugu Naalakkersuisunit tunuarpoq.
IA-mi politikeri tamatuma kingorna Inatsisartunut ilaasortanngoqqissinnaagaluarpoq, taamaakkaluartoq illuanik ukiup nutaap tungaanut napparsimalluni sulinngiffeqarnissani qinnuteqaatigaa.
Maannali Eqaluk Høegh Inatsisartunut ilaasortanngoqqippoq, tamanna Inatsisartut allattoqarfiata nittartagaani atuarneqarsinnaavoq.
Naalakkersuinermik suliaqartoq apriilimi qinersisoqarnerani taaneqarnerpaat ilagaat, 649-nik taaneqarluni. Taamaalilluni partiimi naalakkersuisoqataasuni taaneqarnerpaat sisamaattut inissisimavoq.
Eqaluk Høegh maajimi 2019-imi Naalakkersuisut siulittaasorisimasaannut Kim Kielsenimut (S) allatsitut atorfimmit tunuarami, isumaginninnikkut suliassaqarfimmi allannguerusussimavoq.
Tassunga atatillugu kinguaassiutitigut kannguttaatsuliortarnernut iliuuseqarnissamik amigaateqarneq sakkortuumik isornartorsiorpaa.