Eqalussuaq Nuummi tipisoq
Eqalussuaq 4 miiterisut angitigingajattoq Nuummi nuutoqqami ippassaq tipivoq. Pinngortitaleriffimmi ilisimatusarlutik suliaqartut eqalussuarmik, Nuup Kangerluaneersuugunartumik, misissuisimalereerput.
Nuummi innuttaasut arlallit marlunngornermi ualikkut alutornarluinnartumik takusaqarsimassapput. Eqalussuaq 4 miiterisut angitigingajattoq Nuummi nuutoqqami decemberimi issileruttortoq tipivoq.
Eqalussuaq Nuup avataani tissukartoq takuneqarsimavoq, nuutoqqamilu sissami marlunngornermi tipigussaalluni.
- Eqalussuaq Nuup Kangerluaneersuusimassaaq. Nuuk Kangerluata imartaa itisoorujussuuvoq, annertoorujussuugamilu eqalussuaqarnissaa ilimanarluni. Qularinngilara Nuup kangerluani suli eqalussuaqartoq, Pinngortitaleriffimmi ilisimatooq postdoc., Daniel Estévez-Barcia Sermitsiaq.AG-mut oqaluttuarpoq.
Daniel Estévez-Barcia naapertorlugu eqalussuaq Nuup sissaanut tipigami ningittakkanut napittorsimarpasippoq, sulussugutimigullu ajoquserneqarsimalluni. Eqalussuaq aalisartunit napittorsimasinnaavoq, taamaasillunilu toqunneqarsimassalluni, nassuiaatigineqarpoq. Ningittakkat napigussimasut eqalussuup toqunnginnerani toqoreerneraniluunniit napittorsimanersut ilisimaneqanngilaq.
Takusaq alutornartoq
Eqalussuaq nunatsinni sinerissami avataanilu imaani itisuumi uumasuuvoq. Eqalussuaq 400-t aamma 700-t akornanni ititigisumi pisarineqartarpoq, aammali 3 kilometerisut ititigisumi pisarineqarsinnaasarluni. Eqalussuaq arriitsuararsuuvoq, akunnermut 2,7 kilometerisut isorartutigisumik taamaallaat ingerlasinnaasarluni. Pinngortitaleriffiup paasissutissaatai naapertorlugit eqalussuaq 5,5 miiterisut angitigilersinnaasarpoq.
- Eqalussuaq Nuummi tipigussaasoq qanoq utoqqaatiginersoq qulakkiinngilarput. Qularnanngilarli 100-t sinnerlugit, immaqalu 115-inik ukioqarsimassasoq. Eqalussuaq arnaviaavoq, Daniel Estévez-Barcia oqaluttuarpoq.
Pinngortitaleriffimmit eqalussuaq misissugassanik tigusiffigineqarpoq, misissugassat eqalussuup ukiui pinngoqqaatimigut qanoq inneralu paasiniarlugit, kiisalu allatigut misissuinermi atorneqassaapput. Eqalussuaq nuutoqqami tipiffigisimasaani uuttortarneqarpoq, erlaviilu imaqarnersut misissorniarlugit aamma pilanneqarluni. Sumiiffimmi misissuinerit takutippaat eqalussuup aqajarua imaqanngivissimasoq.
Ilisimatusartut isumaqarput eqalussuaq ningittakkanit napittorneqarluni toqusimassasoq, tamannali eqqoriaanerinnaasoq erseqqissarneqarpoq. Pinngortitaleriffimmi ilisimatusartoq eqalussuarmik misissuisoq Nuummi ukiuni sisamani najugaqareerluni, Nuummi aatsaat eqalussuarmik tipisumik takusimanerarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...