Eqqagassat toqunartullit sissiukkakkut iginneqartut
Namminersorlutik Oqartussat Nuummi talittarfiup eqqaaniit blok R-p S-llu sinnikui pisariaqassappat qaqinniarpaat.
– Aap, pisariaqassappat Tuapannguani blok R-p aamma S-p amiakkui talittarfiliornermi atorneqartut Nuummi sissiukkap eqqaaniit qaqinniarpavut.
Taama oqarpoq nunami namminermi Naalakkersuisoq Anthon Frederiksen, Katusseqatigiit Partiiat, sermitsiaq.ag-mut.
Nuummi Tuapannguani inissiat napasuliat qulit sananeqarneranni blok R-miit S-miillu eqqagassat Nuummi talittarfiup eqqaanut iginneqarput.
Betonimit, qalipaammi fugemassimillu Tuapannguani blokkit pingajorarterutaasa sannartorneranni atorneqarsimasunik Blok Q-mi amiakkuusunik misissuinerup takutippaa, qalipaatigineqarsimasoq PCB-mik ulikkaartoq, taannalu ukiut ingerlaneranni betonip iluanut 2 centimeterinik ilorpasitsigisumut pulasimasoq.
Taamaattumik Blok Q-p sinnikui Nuummi talittarfiup eqqaanut iginneqaratik Danmarkimi Kommunekemimi aserortigassatut nassiunneqarput.
– Naalakkersuisut misissorniarpaat Nuup eqqani qeqertaaqqat eqqaanut eqqakkat qanoq atsigisumik PCB-mik akoqarnersut, taakkulu tinittarneranik ulittarneranillu immami avatangiisinut qanoq sunniitigisarnersut, Anthon Frederiksen oqarpoq.
– Naalakkersuisut misissuinerup kingorna paasisat tunngavigalugit iliuuseqassapput, pisariaqassappallu eqqakkat PCB-mik akullit qaqittariaqassappata taamaaliorluta.
PCB siusinnerusukkut atortussanut qitulisaatitut atorneqartarsimavoq, 1970-ikkulli naaneraniilli atornissaa inerteqqutaalerluni, tamannami inunnut navianaateqartuummat.