Eqqakkanik isumaginninnerup inatsisitigut akuerineqarnissaa millionilikkaanik akeqassaaq
Qeqqata Kommunia Kangerlussuarmi inatsisinik malinnittumik eqqagassalerinermik pilersitsiniarpoq.
Maluginiaruk: Kommunip tigusinissaa pillugu pilersaarut aatsaat 24-p naalernerani/25-p aallartinnerani pissaaq.
Kangerlussuarmi eqqakkat ukiorpassuarni eqqaavissuarmut iginneqarlutik ikuallanneqartarput.
Qeqqata Kommuniata maanna nunaqarfimmi eqqakkanik isumaginninneq Mittarfeqarfinnit tigusussanngorpaa, tassungalu atatillugu kommunip eqqakkanik isumaginninnerup malittarisassat naapertorlugit inissinneqarnissaa pilersaarusiorsimavaa, eqqaavimmimi ammaannartumik ikuallaasarneq ingerlateqqinneqarpat immikkut akuersissuteqartoqartariaqarmat.
Pilersaarut kommunimut 5 millionit koruunit sinnerlugit akeqassaaq, kommunalbestyrelsimillu sisamanngormat ataatsimiinnermi akuerineqarpoq. Avatangiisinut aningaasaateqarfik aqqutigalugu 4,8 millionit koruunit missaannik Naalakkersuisut tapiissapput, kommunip akiligassani kisimi akilinnginniassammagit.
Akiligassat 10 millionit koruunit
Eqqakkanik isumaginninnerup pitsaanerulersinnissaanut pisiassat allattorsimaffiat ima isikkoqarpoq, katillugit 10 millionit koruuninik akeqartussat:
Qeqqata Kommuniani pisortaq Hans Christian Sværd Sermitsiaq.AG-mut oqarpoq eqqakkanik katersivimmik sanaartorneq aasaru aallartinneqassasoq, tassa imaappoq 2024-mi ukiakkut 2025-llu aallartinnerani eqqakkanik isumaginninneq kommunip tigusinnaagaa, illu eqqakkanik isumaginnittarfissaq piareerpat.
Kommunaldirektøri nassuiaavoq eqqakkanik ikuallaavik ammaannartumik ikuallaaviginagu inatsisinut naapertuuttumik kommunip isumagisassanngortissinnaassaguniuk, eqqakkanik assartuummik aammalu aqqusinermi anorliliussaannginniassammata tulukkaniilluunniit aserorterneqannginniassammata ukiukkut eqqakkanik katersuuffimmik nutaanik atortussaqartariaqartoq.
Eqqakkanik naqiterivik eqqakkanik poortuivillu atorneqartussanngorput, eqqakkat aasaanerani umiarsuakkut Sisimiuni ikuallaavimmut ESANI-p ataaniittumut assartorneqarsinnaaniassammata.
Eqqaavissuaq suli Namminersorlutik Oqartussanit aqunneqarpoq
Kangerlussuup eqqaani eqqaavissuup maanna atuuttup aamma Amerikamiut eqqaavissuutaata salinnissaat Naalakkersuisut qallunaallu naalagaaffiata suli akisussaaffigigaat Hans Christian Sværdip erseqqissarpaa.
Qeqqata Kommuniata eqqagassalerinermi ajornartorsiut Mittarfeqarfinnit, Namminersorlutik Oqartussanit, kingornussimavaa. Ukiut ingerlaneranni nunaqarfiup mittarfissuaqarfiup eqqagassalerinermi ajornartorsiutaanut aaqqiissutissanik arlalinnik siunnersuuteqartoqartarsimavoq. Qeqqata Kommuniata suliamik saqqummiussinermini ilaatigut eqqaavaa Namminersorlutik Oqartussat 2014-imi Kangerlussuarmi eqqakkanik isumaginninnerup misissornissaanut pitsanngorsaanissaanullu aningaasaliissuteqartut.
- Tamanna tunngavigalugu Inuplan siunissami eqqagassalerisarnissamut nalunaarusiorpoq, nalunaarummi eqqaaveqarfinnik pingasunik 29 mio. koruuningajalluinnarnik naleqartunik aaqqiissummik allaaserineqarluni. Assartuinermut aaqqiissummut naqiterummut aserorterivimmullu aningaasaliissuteqarnissamik pisariaqartitsivoq. Tamanna aallartinneqanngisaannarpoq.