Eqqartuussaasimasut 66-it utaqqisut allattorsimaffianniittut: »Pinerlineqarsimasunit akuerineqarsinnaanngilaq«
Eqqartuussaasimasut arlalissuit kiffaanngissusiiagaanatik pineqaatissinneqarnissaminnik utaqqipput: - Nunatsinni innuttaasumut ataatsimut naleqqiullugu Europami amerlanerpaanik parnaarussaasoqarpoq. Pineqaatissinneqarsimasunut Inissiisarfinni piffissami sivitsortumi inissanik amigaateqartoqartoq, politikerip oqaatigaa.
Aaja Chemnitz pissutsinut oqaatsimik ataatsimik oqaasissaqarpoq:
Akuerineqarsinnaanngilaq.
IA-p folketingimut ilaasortaatitaata eqqartuussaasimasut amerlaqisut pineqaatissinneqarnissaminnut utaqqisuniinnerat naammaginartinngilaa.
Aviisi AG taama allappoq.
Pissutsit pinerlineqarsimasunut ilungersunartuupput, taakkumi ajornerpaamik pisoqassagaluarpat pinerliisimasoq naaperiasaarsinnaavaat. Ingammik inoqarfinni minnerusuniittuni. Tamannali aamma eqqartuussaasimasunut nuanniilliuutaasarpoq, taakkumi pineqaatissinneqarnerminnik piaartumik qaangeerusuttaramik utaqqisunullu allattorsimaffimmiinnerminni susinnaanngitsutut misigisimasaramik.
Danmarkimi inatsisinik atuutsitsinermi ministerip Peter Hummelgaardip (S) Pinerluuteqarsimasunik Isumaginnittoqarfimmi Qullersaqarfimmeersut kisitsisit nutaanerpaat saqqummiussai tunngavigalugit Aaja Chemnitz qisuariaateqarpoq:
- Nunatsinni eqqartuussaasimasunut utaqqisut allattorsimaffianni 2023-mi juunip ulluisa 26-anni utaqqisut 66-iusut ministerip IA-p folketingimut ilaasortaatitanut akissummini oqaatigaa.
Narrunarsaaneq pillugu suliniut
Kisitsisit nutaat ima itisilerneqarput:
- Taakkunannga 26-t aggersarniarneqarsimagaluarput (taakkununnga ilanngullugit takkutinngitsoortut kinguartitsinerillu), inuillu 15-it parnaarussaanissaminnut aggersarneqarsimallutik. Taakku saniatigut ataaseq sukkanerpaamik aggersarniarneqarpoq aamma inuit 24-t kinguaassiuutitigut kannguttaatsuliorsimasutut eqqartuussaasimasut immikkoortortamut Inussummut (narrunarsaaneq pillugu suliniummut) aggeqquneqarnissaminnik utaqqipput, massakkummi inissaqartinneqannginnamik.
Aviisimi AG-mi atuarnerusinnaavutit. Aviisi uani pissarsiariuk:
