Eqqartuussineq: Breivik talerperlernut ilassinnittoq
Anders Behring Breivik isumannaallisaavigineqaqaluni Oslo Byretimut apuuppoq
Talerperliuniaq ingasattajaartoq Anders Behring Breivik nal. 9 sioqqutitsiarlugu Oslo Byretimi inimut eqqartuussivimmut 250-imut iserpoq, illersuisumilu akornannut ingilluni.
Norgemiu peqqarniisaarsimasutut unnerluutigineqartoq jakkeqarlunilu qilerniusaqartoq paffequtini peerneqarmata assani peqillugu immikkuullarissumik ilassinnippoq.
Eqqartuussisup oqaasii "eqqartuussineq aallartippoq" aallarniutigalugit eqqartuussineq utaqqisaasoq nal. qulingiluanngoqqissaartoq aallartippoq.
Breivik Oslomi illoqarfiup eqqartuussivianut qamussuarnut immikkut mattutsisakkanut ilaalluni nal. 8.20 apuuppoq.
Tamanna akunnerup affaanik sioqqullugu qamussuit parnaarussivimmit Ila-mit siorna juulip 22-ani Oslomi Utøyamilu saassussinermi kingornali tigummigallagaaffigisaminit aallarsimapput.
Sapaatip-akunneri qulit
Parnaarussamik assartuineq illorsuup ataani sulluliaq aqqusaarlugu biilinik inissiisarfimmut naqqullu ataani isaariamiit eqqartuussiviup illutaanut ingerlanneqarpoq.
- Qamutit immikkut isumannaallisakkat atorlugit Breivik assartorparput, ullormiillu ullormut qamutinik piffissanillu assigiinngitsunik toqqaasassalluta, politiit iliuuseqarnermut aqutsisuat Snorre Haugan vg.no-mut oqarpoq.
Taanna ilassuteqarluni oqarpoq, tamanna isumannaallisaatinut Breivikimut suliamut attuumassuteqartunut ilaaginnartoq.
Norgemiup 33-nik ukiullip eqqartuunneqarnera nal. 09.00 aallartippoq sapaatip-akunnerinillu qulinik sivisussuseqassangatinneqarluni.
Ullormi siullermi unnerluussut atuarneqassaaq, Breivikillu pisuunerminik pisuunnginnerminilluunniit apeqqut akissavaa.
Illersuisut eqqartuussissuserisullu toqutaasut ilaasa ilaqutaannut sinniisuusut oqaaseqaateqartinnagit unnerluussisussaatitaasut aallarniutaasumik saqqummiussaqassasut, nutaarsiassaqartitsivik NTB allappoq.