Eqqartuussissuserisoq: Inuusuttoq toqutsisimasoq eqqunngitsumik pineqarpoq
Kalaallip nukappiaqqap, Aalborgimi arnamik 85-inik ukiulimmik toqutsisimasup, eqqartuussissuserisuata suliassaq Strasbourgimi Inuit pisinnaatitaaffiisa Eqqartuussiviannut suliassanngortippaa.
Kalaaleq nukappiaraq, nassuersimasoq 15-inik ukioqarluni 2007-imi aasakkut Aalborgimi 85-inik ukiulimmik Gerda Møllerimik toqutsisimalluni, qaammatini 17-ini parnaarussaalluni tigummigallarneqarsimavoq.
Tamanna sivisuallaaqaaq, nukappiaqqap eqqartuussissuserisua Nicholas Symes oqarpoq, taannalu Strasbourgimi Inuit pisinnaatitaaffiisa Eqqartuussiviannut maalaaruteqarsimavoq, taamatut allappoq politiken.dk.
– Meeqqat inuusutullu 18-it inorlugit ukiullit parnaarussaaqqallutik tigummigallarneqarnerat nalinginnaasumik qaammatinik sisamanik killeqartinneqartarpoq - suliassani erloqinartuni massumatut ittuni qaammatit arfineq-pingasuusarlutik. Qaammatilli arfineq-pingasut qaangerneqassappata pissutsit immikkut illuinnartut atuussimassapput. Matumani inuup taamak inuusutsigisup taamatut sivisutigisumik tigummigallarneqarneranut pissutsit immikkut ittut suunersut paasissutissinneqarsinnaasimanngilagut, Nicholas Symes oqarpoq.
Nicholas Symes naapertorlugu isumaa malillugu qaqutigoortumik sivisoorsuarmik tigummigallarneqarneranut pissutaasut ilagaat, nukappiaqqap eqqarsartaatsimigut misissorneqarnerata sivisusimanerujussua.
Maalaarut
Inuit pisinnaatitaaffiisa Eqqartuussiviannut maalaarummi eqqartuussissuserisup erseqqissaatigai suliap suliarineqarnerata sivisunerujussua, tigusarineqartup ´inuppalaanngitsumik´ pineqarsimanera kiisalu naalagaaffiup kalaallimik inuusuttumik ´sivisuallaamik´ ´tunngavissaqanngitsumillu´ tigummigallartitsisimanera.
– Parnaarussaaqqalluni tigummigallarneqartarneq sapaatip akunnerinik sisamakkaarneqartarpoq. Isumaqarpunga inuppalaanngitsumik - ilami naalliutsitsinermik - pinninnerusoq, inuup inuusuttup taamatut sivisutigisumik uninngaannarluni eqqartuunneqarnissaminik utaqqisinneqarnera, Nicholas Symes oqarpoq.
Nicholas Symesip nassuerutigaa pinerlussimaneq erloqinartorujussuusoq - pinngitsaaliineq toqutsinerlu - isumaqarporli suliassaq tunngaviatigut pingaarutilerujussuusoq.