Eqqartuussisumut inuunermik siorasaarisimasoq ulluni 30-ni pineqaatissinneqartoq
Angut 50-inik ukiulik eqqartuussisup inuuneranik siorasaarisimasoq pinerluuteqarsimasunut inissiisarfimmiittussanngortinneqarpoq. Eqqartuussiviup aalajangersimasaa angutip nunatta eqqartuussivianut suliassanngorteqqissimagaluarpaa, nunattali eqqartuussiviata suliassanngortitseqqiineq itigartippaa, suliarineqaqqinnissaanut angut pineqartoq eqqartuussivimmut najuukkiartorsimannginnera pissutigalugu.
Angut 50-inik ukiulik eqqartuussisup inuuneranik siorasaarisimasutut pineqaatissinneqarluni ulluni 30-ni pinerluuteqarsimasunut inissiisarfimmiittussanngortinneqarpoq.
Siorasaarineq oqarasuaatikkut oqaluussinermi 7. marts 2023 tusartinneqarsimavoq. Angut Sermersuup Eqqartuussiviani sulisumut siorasaarisimavoq.
- Oqarasuaatikkut oqaluussinermini ilanngullugu sulisumut eqqartuussisoq siorasaarlugu oqarsimavoq, oqarsimallunilu pinerluttunik ilisimasaqarluni eqqartuussisumik toqutsisinnaasunik, Kalaallit Nunaanni Politiit tusagassiorfinnut nalunaaruteqarlutik allapput.
Suliassanngortitseqqiineq itigartinneqartoq
Suliaq Sermersuup Eqqartuussiviani siorna 26. oktober suliarineqarsimavoq, angullu ulluni 30-ni pineqaatissinneqarsimalluni.
Pineqaatissinneqartup suliaq nunatta eqqartuussivianut suliassanngorteqqissimavaa. Suliarli nunatta eqqartuussiviani sisamanngornermi suliarineqartussanngormat, eqqartuunneqartoq najuussimanngimmat, suliassanngortitseqqiineq itigartinneqarpoq.
- Unnerluunneqartoq nunatta eqqartuussivianut suliassanngortitseqqiinermi ornigussimanngilaq. Tamanna isumaqarpoq eqqartuussiviup aalajangiinera malillugu angut ulluni 30-ni pineqaatissinneqarsimasunut inissiisarfimmiittussanngortinneqartoq, aqqusinermilu angallannermi inatsimmik unioqqutitsisimanini pillugu aamma 1.000 koruuninik akiligassinneqassasoq, nalunaarutigineqarpoq.
- Inuup allap, suliffia piinnarlugu, inuuneranik siorasaarineq akuerineqanngisaannassaaq. Suliami pineqarput eqqartuussisoq eqqartuussivimmilu sulisoq. Iluarisimaarpara eqqartuussiviup aalajangernera, tassa ulluni 30-ni pineqaatissiineq, maanna atuuttussanngortinneqarmat, Kalaallit Nunaata Politiivini unnerluussisussaatitaasoq, Mariam Khalil oqarpoq.