Eqqartuussisuserisut piginnittui nikittut
2008-mi januaarip aallaqqaataaniit eqqartuussissuserisup Henrik Heyip, Eqqartuussissuserisut Hey & Paulsen eqqartuussissuserisumut Jens Paulsenimut ingerlatassanngorlugu tunniutissavaa.
Henrik Hey suliffeqarfimmi eqqartuussissuserisutut suleqatini Jens Paulsen aamma Niels-Ulrich Barslev peqatigalugit suliinnassaaq. Suliffeqarfiup aqqa allannguuteqassanngilaq.
- Isumaqarpunga tunuartilaarnissara pissusissamisoortoq. Suliffeqarfiup ingerlateqqinnissaanut ineriartortinnissaanullu akisussaaffik toqqissillunga Jens Paulsenimut tunniuppara. Qilanaaraara suli ukiuni arlalinni sulisutut ingerlaqqinnissara, eqqartuussissuserisoq Henrik Hey oqarpoq. Taassuma suliffeqarfiutini 1985-imiilli ingerlatarisimavaa.
Piginnittunngortup suliassani qilanaarai.
- Kalaallit Nunaanni annertuunik unamminartoqarlunilu periarfissaqarpoq. Taamatut ineriartorneq peqataaffigalugu assut pissanganarpoq, Jens Paulsen oqarpoq ingerlaqqipporlu:
- Suliffeqarfiup ingerlanermini tunngavia suli tassaassaaq pitsaassusilimmik sukkasuumillu siunnersuineq sullissinerlu. Ineriartortitsinissaq pillugu isumassat pigaakka suliffeqarfilli ingerlatiligassara inatsisilerinikkut, aningaasaqarnikkut aqunneqarnermigullu ingerlalluartuuvoq, taamatullu tunngavissaqarluni ingerlatsinerup allanngortinnissaa pilersaarutiginngilara.