Eqqartuussiveqarfimmi ukiut marluk sinnerlugit sulianik suliarinnittoqartartoq – naleqqutinngilaq, politikeri oqarpoq
Eqqartuussiveqarfik Kujallermi pinerluttulerinermik suliat eqqartuusseqataaffigineqartut agguaqatigiissillugu ulluni 786-ini suliarineqartarnerat naatsorsorneqarpoq.
Nunatsinni eqqartuussiveqarfinni pinerluttulerinermik suliat suliarineqarnissaat sivisuumik utaqqineqarsinnaasarpoq.
Danmarkimi Domstolsstyrelsenip aamma Justitsministerietip, Folketingimut ilaasortamut Aaja Chemnitzimut (IA) akissuteqaammut ilanngullugu naatsorsuinerisa tamanna takutippaat.
Naatsorsuinerup assersuutigalugu Kujallermi pinerluttulerinermik suliat eqqartuusseqataaffigineqartut 2022-mi agguaqatigiissillugu ukiut marluk sinnerlugit suliarineqartartut takutippaa.
Nalorninartortaqartoq
Ataani takusassiami suliat suliarineqarneranni piffissaq atorneqartoq nikerartarpoq:
Eqqartuussiveqarfinnut ataasiakkaanut agguaqatigiissillugu suliat suliarineqartarneranni piffissaq atorneqartartoq nalorninartortaqarpoq. Takussutissami allami eqqartuusseqataasoqanngitsumik sulianik suliarinnittarneq takusassiarineqarpoq. Tassanilu suliat suliarineqartarnerat sivikinneruvoq:
Folketingimut ilaasortap Aaja Chemnitzip suliassaqarfimmi inissisimaneq naammaginngilaa, Sermitsiaq.AG-mut taanna oqaluttuarpoq:
- Suliat suliarineqartarnerisa sivisusarnerat naleqqutinngilaq, allaat Kujallermi ukiut marluk sinnerlugit. Akuersaarneqarsinnaanngilaq, Aaja Chemnitz oqarpoq.
Inuit inuunerannik sunniisartoq
Pinerluttulerinermik suliat ingerlaneranni inuit inuunerannut sunniuteqartartut taassuma oqaatigaa, taamaattumillu suliat suliarineqartarnerisa sivisussusaat naleqquttariaqarput. Suliat ilaanni tigummigallarneqartut eqqartuussaanissartik utaqqisinnaasarpaat.
- Taamaattumik sulianik suliarinnittarnerup sivikinnerulernissaa pisariaqartinneqarpoq, politikeri oqarpoq.
Eqqartuussiveqarfiit danskit oqartussaaffigaat, Aaja Chemnitzillu maanna danskit naalakkersuisuinik suliassaqarfik pillugu isumaqatiginninniarnini oqaluttuaraa.
Eqqartuussisut amerlanerunissaat neriuutigigaa
Chemnitzip oqarnera naapertorlugu Danmarkimi suliat suliarineqartarnerat qaammatit arfineq-pingasut missaannik sivisussuseqartarpoq, tamannalu danskit politikerit amerlasuut naammaginngilluinnarpaat:
- Kalaallit Nunaannut sanilliukkaanni sulianik suliarinnittarneq ukiut marluk sinnerlugit sivisussuseqarsinnaasarpoq, tamannalu ilungersunartuusoq isumaqarpunga.
- Eqqartuussisunik amerlanerusunik atorfinitsitsineq aaqqiissutaasinnaavoq. Piffissamilu sivisuumi taanna ilungersuutigaara, neriuppungalu erngertumik paasisaqarfigissallugu, Aaja Chemnitz oqarpoq.