Eqqartuussivimmit Tilliemut inerteqquteqartitsiniarneq itigartinneqartoq
Nunatsinni Eqqartuussiviup Suleqatigiissitsisuni siulittaasuugallartumu Tillie Martinussenimut partillu aningaaserisuanut inerteqquteqartitsiniarneq itigartippaa. Michael Rosing tassaavoq partiip aqqa atorlugut taasigassarsisinnaanermut inerteqquteqartitsiniaraluartoq.
Michael Rosingip eqqartuussissuserisua aamma Tillie Martinussenip Jesper Enevoldsenillu eqqartuussissuserisuat sapaatip akunnerani kingullermi Suleqatigiissitsisut aningaasaqarnerat pillugu aaqqiagiinngissuteqarneq pillugu naapeqatigiipput.
Partiimik pilersitseqataasup Michael Rosingip partiimut tapiissutinik atuivallaartoqarsimaneranik atornerluisoqarsimaneranillu pasilliuteqarluni, siulittaasuugallarttup aningaaserisullu partiip aqqa atorlugu taarsigassarsisinnaanerannut decembarimi nuna tamakkerlugu ataatsimeersuartoqannginnerani inerteqquteqartitsinissaq piumasarisimavaa.
Rosingip partiip siunissami aningaasaqarnissaa ernumanartoqartissimavaa, oqaatigalugulu partiimi suli nammineq siulittaasuulluni, 2018-imili partii pilersinneqarmat suli nuna tamakkerlugu ataatsimeersuartoqannginnera pissutigalugu.
Siulittaasutut atuuffik aaqqiagiinngissutaasoq
Akerlianik Tillie Martinussen siulersuisuunerillu isumaqarput, Michael Rosing siulittaasutut tunuarsimasoq, partiillu partiimut tapiissutinik atuineranut siulersuisuunerit akuersissutigisimasaannut akuliunnissamut pisinnaatitaaffeqanngitsoq.
Eqqartuussiviup inerteqquteqarnissamut itigartitsissuteqanermini tunngavilersuutigaa, Michael Rosing partiip siulittaasuatut atuuffeqaqqilersimannginnera, taamalu iliuuserisineqarsimasunut inerteqquteqartitsiniarnerminut eqqartuussisarnermi inatsit naapertorlugu uppernarsaatinik takutitsisimannginnera.
Nammineq inuttut atuisimasutut pasilliinerit
Piffissami kingullermi ilaatigut saqqummiunneqartarput, partiit Tilliie Martinussenip kiinarissartinneranut, katsorsartinneranut, allamut nuunneranut inigisaatalu qalipanneqarneranut aningaasanik atuisoqarsimasoq, tassa Michael Rosing siulersuisuunernilu ilaasortaasimasut arlallit isumaat malillugu siulittaasuugallartoq Tilliie Martinussen nammineq inutttut atuisarsimavoq.
Unnerluutiginnissutaasut Tillie Martinussenip siulersuisullu eqqortuunnginnerarpaat.