Eqqartuussut kiserngoruppoq
Kunuunnguaq Korneliussen pillugu eqqartuussineq naammassineqangajalerpoq. Eqqartuussut nal. 13.00 oqaatigineqassaq
Ullut pikkunartut marluk qaangiutereerput. Ukioq´manna eqqartuussivimmi suliassat uissuumminarnersaaat naammassineqalerpoq.
Ullaap´tungaani unnerluussisussaatitaasut aamma illersuisup inunnik pingasunik toqutsisimasup Kunuunnguaq Korneliussenip pineqaatissinneqarnissaa pillugu piumasaqaatitik saqqummiuppaat. Kunuunnguaq Korneliussen Nutaarmiuni suliassami 2012-imi februaarip ulluisa arfineq-pingajuaneersumi inunnik sisamanik toqutseriarsimasutut aamma inummik toqugasumut kanngutsaatsuliorsimasutut unnerluutgineqarpoq.
Herstedvesterimut taarseerujussuartussanngortillugulu
Unnerluussisussaatitaasut Kunuunnguaq Korneliussen Danmarkimi Herstedvesterimi sivisussissaa aalajangerneqanngitsumi parnaarunneqarnissa aamma toqutaasut qimataasut anniartinneqarnerannut kanngutsaatsuliorfigineqarnerannullu katillugit 836.500 koruuninik taarsiisussanngortinneqarnissaa piumasaqaatigaat. Angutip toqoriarneqaraluartup ulluni 42-ni sulisilluni isertitassaraluaminik annaasai ilanngunneqassapput.
Kunuunnguaq Korneliussenip illersuisuata Kunuunnguup nunatsinni sivisussusisaa aalajangersimasumi Pineqaatissinneqarsimasunut Inissiisarfimmiittussanngorlugu eqqartuunneqarnissaa piumasaqaatigaa. Unnerluutigineqartup taarsiisussaatitaanernermik piumasaqaateqarfigineqarnini akueraa aningaasalli ikisilinneqarnissaat kissaatigalugu.
Kisianni unnerluussisoq aamma illersuisoq naggataarutaasumik oqaaseqareermata Kunuunnguaq Korneliussen oqaaserumajunnaarmat eqqartuussutip ullumi nal. 13.00-imi oqaatigineqarnissaata tunngaanut eqqartuussineq unitsinneqarallarpoq.