Eqqissiviilliortoqareersorlu: Puisit amiisa akii isumaqatigiissutigineqarput
Puisit amiinik tunisinermi akit isumaqatigiissutigineqartut Naalakkersuisut tusagassiuutitigut nalunaaruteqarput. Tunisinermi akit qaffapput.
Naalakkersuisut, Great Greenland A/S aamma KNAPK 2024-mut puisip amiinut tunitsiveqarnermut tapiissutit pillugit isumaqatigiissuteqarput.
- Isumaqatigiissut pingaaruteqartoq pitsaasorlu maannakkut isumaqatigiissutigineqarpoq. Isumaqatigiissuteqarnissap tungaanut oqaloqatigiinnermut peqataasut qutsavigaakka. Tamanna pilersitsiviulluartumik aammalu aaqqiissutissarsinissaq ukkataralugu ingerlanneqarsimavoq. Puisit amiinik tunisisarnerup siunissaa piniartunullu atugassarititaasut tamaviaarput aammalu silap pissusaata allanngoriartornera inuussutissarsiummut sunniivoq. Taamaattumik pisariaqartitsinerit pilertartut aamma pissusiviusut atukkagut, ukiuni makkunani sukkasuumik allanngortartut, pillugit oqaloqatigiinnerup attatiinnarnissaa pingaaruteqarpoq, Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen tusagassiuutitigut nalunaarutimini taama allappoq.
Natsiap amia 70 cm-init minnerusoq 329 koruunilerlugu tunineqarsinnaavoq, natsiap amia 70 cm-inik annerusoq 358 koruuneqarluni. Aataallu amia tunigaanni 478 koruuneqassaaq.
Neriuutigaarput isumakkeerfigineqarsinnaassagitsigut
Ukioq nutaaq nallertinnagu puisit amiinik tunisinermi akit suli isumaqatigiissutigineqarsimanngimmata Siumumit ilaasortat KNAPK Great Greenlandili isornartorsiorpaat piaartumillu isumaqatigiissusioqqillugit. Maannali isumaqatigiissusiorput. KNAPK-llu neriuutigaa isumakkeerfigineqarsinnaassallutik.
- KNAPK-imiit 2024-mut tunisinermut akigititat, tapiissutit, bonusit aammalu tunitsiveqarnermut ilitsersuutit maannakkut kiisami inissitsillugit isumaqatiginninniutigineqareermata nuannaarutigaarput. Inernera kingusinaalaartumik inissikkaluartoq neriuutigaara inuussutissarsiutigalugu piniartut tamatumunnga isumakkeerfigisinnaagaatigut, tassami akigititat qaffallugit iluarsineqarmata.
Piniarnermik inuussutissarsiorneq naluneqanngitsutut annertuumik tamaviaarfiuvoq, pingaartumik atuisartunut akigititat qaffakkiartuinnarneranni. Taamaattumik tunisinermut akigititat qaffallugit iluarsineqarnerat piniartorpassuarnut annertuumik iluaqutaasussaavoq, KNAPK tusagassiuutitigut nalunaarummi allappoq.
2024-mi katillugit annerpaamik nalinginnaasumik tunitsiveqarneq 12.970.100 koruuniuvoq.