Eqqusseqqusiunnaarnermut uumasunik illersuiniaqatigiit peqqutaapput
Puisinit tunisassianik EU-mut eqqusseqqusiunnaarneq piujuartitsinermik imaluunniit niuernermik peqquteqanngilaq, Inuit suliniaqatigiiffianeersoq isumaqarpoq, EU-mik eqqartuussivimmut suliassiissuteqartoq.
Kalaallit Nunaanni ICC, KNAPK Canadamilu Inuit EU-mik eqqartuussivimmut suliassanngortitsinerisa siunertaraat, puisinit tunisassiat EU-mut eqqusseqqusiunnaarnerup atortussaajunnaarsinnissaa.
- Eqqusseqqusiunnaarneq piujuartitsinermik peqquteqanngilaq. Aamma niuernermik peqquteqanngilaq. Eqqusseqqusiunnaarnerli uumasunik illersuiniaqatigiit piliaraat, taakkumi annertuuumik sunniuteqarnerat eqqusseqqusiunnaarnermut WTO-p aalajangersagaanik malittitsinianerunngitsumut peqqutaavoq, taama oqarpoq Kalaallit Nunaanni ICC-p siulittaasua Aqqaluk Lynge ullumi ICC-p illuutaani tusagassiuutinik katersortitsinermi.
KNAPK-p siulittaasua Leif Fonteine isumaqarpoq, EU-p eqqusseqqusiunnaarnera nunap inoqqaavisa pisinnaatitaaffiinik unioqqutitsinerusoq.
- Puisinik piniarneq atuineruvoq tunisassiornerlu piujuartitsinermik tunngaveqartoq. Eqqusseqqusiunnaarnerup piniartut ilaqutaasa inuunerminni atugaannik isertitaanillu eqquivoq, Leif Fontaine oqarpoq.
Fontainep nalunaarutaa piniartumit Johannes Egedemit Nuummi aalisartut piniartullu peqatigiiffianeersumit taperserneqarpoq.
- Puisit amerliartuinnartut takusarlugit kipiluttunarpoq, nalunagu puiserpassuarnik tunisassiorsinnaanata, Johannes Egede oqarpoq.
Lissabonimi isumaqatigiissut EU-mi decembarip aallaqqaataani atulersoq naapertorlugu EU eqqartuussivimmut suliassiissutitissallugu periarfissaqalerpoq. Isumaqatigiissut malillugu periarfissaqarpoq EU-mi Inatsisartut aalajangigai unamminnersinnaanermut tunngasut EU-mi eqqartuussivimmut suliakkiissutigissallugit.
Puisinit tunisassianik eqqusseqqusiunnaarneq atuutilissaq ukioq manna aggustip aallaqqaataani.