Erik ajugaanermi kingorna: Naalakkersuisoqatigiinni suleqatigiinneq qimerluussavarput
Siumut politikkikkut suliniutissanik arlalinnik akuersissutiginnereersorlu Inuit Ataqatigiit aamma Siumup akornanni naalakkersuisoqatigiinni suleqatigiinnermut tunngaviit allanngorput. Suleqatigiinneq immaqa naleqqussaavigineqassaaq, kisianni Erik Jensen naalakkersuisoqatigiinniiginnarnissamik siunniussaqarpoq.
Siumut partiimi politikkikkut anguniagassanik nutaanik nutaanik suliniuteqarfiusussanik akuersissutiginnippoq. Tamanna IA-mik naalakkersuisoqatigiinni suleqateqarnermut sunniuteqalersinnaavoq. Erik Jensenip Múte B. Egede sapaammi unnukkut oqaloqatigereersimavaa, naatsorsuutigalugulu marluullutik suleqatigiinnerup ingerlateqqinnissaanut aqqutissamik nassaassallutik.
2023-2026-mut politikkikkut anguniakkani nutartikkani piumasaqaatit malunnaateqarnerpaartaat tassaapput:
- Siumup piumasaraa Naalakkersuisut Naalagaaffinngornissamut Naalakkersuisumit ilaneqassasut. Pineqartup naalagaaffinngornissamik suliaq sukkanerulersinniarlugu suliniutit assigiinngitsut arlalissuit ataqatigiissaassavai sulissutigissallugillu.
- Siumup uranimut politikkiminik aalajangiusimanninnini nalunaarutigaa, tassalu uranimik saniatigut tunisassiatut atuisoqarsinnaasariaqartoq. Tamatumuunali suliniutit illoqarfinnut qanittumiittut pineqartillugit, assersuutigalugu Kuannersuit, najukkami innuttaasut akuutinneqarnissaat qulakkeerneqarsimassalluni.
- Siumut akisussaaffinnik tigooraanissat qanoq pingaarnersiorneqarnissaat pillugu isumaliutissiissummik pilersitsisisussamik ataatsimiititaliarsualiorusuppoq.
- Siumup akiitsunik akiliisitsiniartarneq kommuninut uterteqqikkusuppaa kommunillu akornanni naligiissaarisarnermik aaqqissuussineq allanngortikkusullugu.
Taakkua tassaapput ataatsimeersuarnermit quppernerit 70-ingajaat ilaannit tigulaakkat.
Erik Jensen: Múte oqaloqatigereerpara ullunilu tulliuttuni oqaloqatigeqqissalluta
Siumup politikkikkut anguniagaani nutaani pilikki suliluunniit panerluarsimanngilaq, partiillu angisuup allattoqarfia sapaatip-akunnerata naanerani aalajangiunneqarsimasunik allaqqissaarilereersimalluni.
Erik Jensenip Sermitsiaq.AG-mut uppernarsarpaa, sapaammi unnukkut siulittaasumut qinersinerup kingorna Naalakkersuisut siulittaasuat, Múte Bourup Egede, oqaloqatigereersimagini:
- Aap, oqaloqatigiissutissaqangaatsiarpugut, tamannalu aallartissimavarput. Aamma aap, partiimi anguniakkavut naalakkersuisoqatigiinni suleqatigiinnerup nalilersornissaanut tunngavissiipput, kisianni Inatsisartunut tullianik qinersinissap tungaanut naalakkersuisoqatigiinni sammiviup ingerlatiinnarnissaa qineqqusaarutigisimavara, tamannalu piviusunngortinniarpara.
Erik Jensenip erseqqissaatigaa, suleqatigiinnerup sukumiisumik nalilersuiffiginissaa pisariaqassasoq.
- Taava takussavarput, anguniakkanit nutaanit qanoq annertutigisunik atuutilersitsisinnaassanerluta, Erik Jensen oqarpoq.