Erik Jensen: Milliuunilikkuutaat ikiorsiissutigineqassapput
Aningaasat naleerukkiartornerat pissutigalugu milliuunilikkuutaat qulikkuutaat ikiorsiissutissatut atorneqarnissaannut Naalakkersuisut piareersimapput, innuttaasut isertitakinnerusut ikiorneqarnissaat qulakkeerumallugu.
Aningaasaqarnermut Naalakkersuisoq Erik Jensen akileraartarnermut aningaasaqarnermullu ataatsimiititaliami ullumi siunersiorneqarpoq, tassanilu ilisimatitsissuteqarluni aningaasat nalikilliartornerat pissutigalugu ikiorsiissutinik piareersaasoqartoq.
Erik Jensenip ikiorsiissutit qanoq imaqarpiarnersut oqaatigerusunngikkallarpaa, Akileraartarnermut Aningaasaqarnermullu Ataatsimiititaliap sulinera ataqqillugu. Naalakkersuisut suliniutitut innersuussutaat Ataatsimiititaliap aalajangiiffigisussaavaa.
Milliuunit qulikkuutaat
- Oqaatigisinnaavara milliuunit qulikkuutaat pineqarput. Aningaasat qanoq amerlatigissanersut Akileraartarnermut Aningaasaqarnermullu Ataatsimiititaliap akuersissutigisaanik aallaaveqartussaapput, Erik Jensen Sermitsiaq.AG-mut oqarpoq.
Taanna ilisimatitsivoq ikiorsiissutit agguataarneqassasut, piffissallu aalajangersakkat qaangiunnerini tunniunneqartassallutik.
Eqimattat uku Naalakkersuisunit ukkatarineqarnerussapput:
- Ilaqutariit meerartallit
- Isertitakinnerit
- Isorliunerusuni najugaqartut, silallu pissusaa pissutigalugu isertitaqarniarnermik ilungersuuteqartut
- Akileraartarnermut Aningaasaqarnermullu Ataatsimiititaliap qinnuteqaaterput pinasuartumik suliarissappagu, neriuutigisinnaavara innuttaasut ilaannut agguaassineq siulleq juullertinnagu pisinnaasoq, allalli ukiortaareernerani pissarsisinnaanissartik naatsorsuutigisinnaavaat, Erik Jensen ilisimatitsivoq.
Kommunit peqataatinneqarput
Taanna nassuiaavoq sulinermi kommunit peqataatinneqarsimasut, isumaginninnerup iluani ikiorsiissutit kommunit ataanni ingerlanneqarnerat pissutigalugu, sulilu pissutsit allat aamma qulaajarneqartariaqartut.
Taamaasiunnginnermili inatsimmik aamma tunngaveqartoqartariaqartoq, Erik Jensen ilisimatitsivoq. Tassani assersuutigineqarpoq avannaani nunaqarfinni najugaqartut, silap pissusiata allanngorsimanerani isertitaqarsinnaajunnaarsimasut ikiorserneqarnissaat.
Pissutaasoq
Aningaasat naleerukkiartornerat pissutigalugu nioqqutissat akitsoraluttuinnarput, sanaartornermilu aningaasartuutit aamma annertuneruleriartorlutik. Akitsuisoqartareeraluartoq Royal Arctic Line aamma aalajangerpoq assartuinermut aappaagu akitsuissalluni - akitsuinerlu atuisut nioqqutissanik pisiniartarnerannit aamma akilerneqartussaassaaq.