Erik Jensen (S): Aalisariutini inuttalersuisarneq pillugu nalunaarut aappaagu piariissaaq
Aningaasaqarnermut Naalakkersuisoq, Erik Jensen, 2024-mut aningaasanut inatsisissaq pillugu isumaqatigiissummut akisussaasuussoq, Sermitsiaq.AG-mut oqarpoq nalunaarut nutartigaq 2024-mi piareerneqassasoq.
Kisitsisaatigineqanngilaq aqumiut nunaqavissut nunatsinni qanoq amerlatigisut suliffissaaleqinermik eqqugaasimanersut, imaluunniit kilisaatini inuttanngorusukkaluarlutik tigujumaneqannginnermik kingunerisaanik allami suliffeqarnersut.
Taamatuttaaq Imarsiornermik Ilinniarfik aqumiussanik suliffissaaleqisussanngorlugit qanoq annertutigisumik ilinniartitsisarnersoq takussutissaqanngilaq. Taamaattorli politikkikkut suliassatut pingaarnersiukkanut ilaavoq kilisaatini nunaqavissut sulisorineqarnissaat siunertaralugu piaarnerpaamik iliuuseqartoqassasoq.
Kisiannili qanoq ilillutik politikkikkut suliallit nalunnginnamikku nalunaarummik sukaterinikkut inuttat nunaqavissuunissaannik piumasaqarneq qulakkeerinninnissaq pisariaqartinneqartoq?
- Piffissap ingerlanerani inunnik arlalinnik saaffigineqartarpugut, kilisaatini aqumiuunissaminnut piukkunnaateqaraluarlutik oqaluttuartartunik kilisaataatilinnit atorfinitsinneqarumannginnertik pillugu, taamaammat nalunngilarput ajornartorsiut ilumoortoq, taamaammallu aamma politikkikkut iliuuseqarnissaq pisariaqartoq.
- Taamaattorli nikussutiinnarlugu oqaluttuarisinaanngilara, aqumiutut ilinniarsimasut qassit suliffissaaleqisuunersut, imaluunniit ilinniarnikuugaluarlutik allanik suliffissarsiortariaqartarsimanersut, qularinngilarali suliap ingerlanerani paasissutissat erseqqinnerusut saqqummerumaartut, taakkulu uppernarsarumaaraat ajornartorsiut piviusuusoq, Erik Jensen oqarpoq.
Imarsiornermik ilinniarfiup pingaarnersiuinermi siuarsarnissaa piareersimaffigineqartoq
Polar Seafood-ip tungaanit kaammattuutigineqarpoq Imarsiornermik ilinniarfik pingaarnersiuinermi siuarsarneqartariaqartoq, aqumiut nunaqavissut amerlineqarnissaannik, taamaalillunilu aqumiut 90 procentii nunavissuunissaannik piumasaqaat iluatsittumik naammassineqarsinnaassappat.
Aperineqarami Naalakkersuisut piumassuseqarnersut ilinniarfiup taassuma siuarsaavigineqarnissaanut aammalu taamaattoqarsimappat qanoq iliorluni aningaasallu qassit atorlugit siuarsaaneq pisinnaanersoq, Erik Jensen innersuussivoq inatsisitigut suliassat ingerlanneqaqqaassasut, qularingikkinilu suliaq qanoq iluatsittumik ingerlanneqarsinnaanersoq ersarissunngorumaartoq. Taamaattorli Jensen aamma erseqqisassaavoq Imarsiornermik ilinniarfiup aqumiunngorniartut ilinniarfigisartagaata siuarsaavigineqarnissaa Naalakkersuisunit piareersimaffigineqartoq:
- Anguniagarput angussavarput, aammalu iliuutsit pisariaqartut iliuuseralugit anguniarlugu sulissaagut, aamma tamanna isumaqassappat ilinniarfik amerlanerusunik aningaasaliiffigineqarluni siuarsaavigineqarnissaanik, maannangaarli siusippallaarpoq kisitsisinik taakkartuinissaq, kisiannili qularineqassanngilaq piumasaqaateqarutta aamma tamanna pisussaaffittaqartoq ilisimaaralugu suliaq aallartissagatsigu, aamma aningaasatigut kingunissai eqqarsaatigalugit.
- Kisiannili erseqqissaatigeqqissavara anguniakkamik aalajangiussinitsinniit sulineq aatsaat aallartilaarpoq, taamaammat maannangaaq taggissinnaanngilara qanoq aningaasatigut tamanna kinguneqassanersoq, Erik Jensen erseqqissaavoq.
Aamma aalisartoqarpoq aqumiussatut piukkunnartunik
Aningaasaqarnermut Naalakkersuisoq Erik Jensen (S), Sermitsiaq.AG-mut oqaluttuarpoq partiit isumaqatigiissuteqartut isumaqatigiissutigigaat anguniagaq matumani pineqartoq sapinngisamik piaartumik suliarineqassasoq aamma naammassiniarneqassasoq, tassalu aalisariutini inuttalersuisarneq pillugu nalunaarut aqqutigalugu nunaqavissut amerlanerit atorneqarnissaannik piumasaqaat naammassiniarneqassasoq, taamaammallu tusarniaanerit allallu nalunaarutip allanngortinneqannginnerani suliassat ingerlanneqassasut siunertaralugu aappaagu nalunaarutip piareernissaa.
Taamaattorli aalisarnermut akuersissutaatillit pisassaat TAC aqqutigalugu aalajangersakkat aamma malinneqartussaapput, pisassallu taakku aalajangeeqataasorujussuupput nunatta imartaani kilisaatit qassit aalisartinneqarsinnaanersut pisassat nungunneqartassappata, tassanilu kilisaatini aqumiutut inuttat taarsersornissaannut qanoq amerlatigisut pisariaqartinneqarumaarnerput? Aqumiut qassit ilinniartinneqassappat? Suliffissaqarnissaat qulakkeerlugu ilinniartinneqassappat imaluunniit ilinniassappat suliffissaaleqinermut eqqugaanissaat annertulluni?
- Anguniakkamut tunngatillugu immikkuualuttut utaqqissunneqalaartariaqarput, taamaattorli ataatsimut isigalugu nunaqavissut aqumiut atorfissaqartinneqartorujussuupput, pingaartumik aalisarnerup iluani. Isumaliutigineqartut ilagaat aamma aalisartut kilisaatini inuttat aqumiunngortinneqarsinnaanissaaannut periarfissiisinnaaneq, soqutiginnittoqarpormi ilinniartinneqarnissamik neqeroorfigitinnissaminnut utaqqiinnartunik, aamma taakku periarfissinneqartariaqarput.