Erik Jensen (S): Qernertuliorlutik aningaasarsiupiluttut unitsinniarneqassapput
- Anngiortumik ininik attartortitsinermikkut aningaasarsiupiluttoqarpoq, akileraartarneq avaqqullugu sulisitsisoqarpoq niuernikkullu qernertuliortartut anngiortumik aningaasanik qalooripput. Tamakku pipput nunatsinni atugarissaarnerup annertusarneqarnissaanik tamaviaarutiginnittoqartoq nunattalu aningaasaqarnikkut ataqatigiissumik ingerlanneqarnissaanik tamaviaarutiginnittoqartoq, aningaasaqarnermut akileraartarnermullu Naalakkersuisoq Erik Jensen oqarpoq.
Sermitsiaq.AG-mit aningaasaqarnermut akileraartarnermullu Naalakkersuisoq, Erik Jensen (S) qinnuigaarput innuttaasut sulinermikkut akileraartartut akilersuutigeriisaasa qaavisigut akiligasseqqinnginnissaat qanoq qulakkeerniarneqarnersoq attassiinnarnissamik ineriartortitsinermullu pilersaarut iluatsissappat.
Erik Jensen nassuiaavoq ilinniartitaanikkut qaffassaaneq aammalu piginnaasanik annertusaaneq, tamatumalu saniatigut inuussutissarsiutit isaatitsissutaasut annertusarneqarnissaat, soorlu aalisarnikkut isertitsissutaasartut annertusarneqarnissaat aammalu erngup nukinga atorlugu nukissiorfissualiornikkut periarfissaalersussat kiisalu minnerunngitsumik aatsitassarsiornerup tungaatigut annertusaanissaq.
Tamakkuli ilisimaneqareerput, tassami naalakkersuisooqatigiiusartut qinersivinni arlalinni siunnerfilimmik anguniagaat sulissutigineqartut ilisimaneqarput. Taamaammat innersuussutigalugu 2028-mi aningaasartuutit isertitanit amerlanerulernissaannik aarleqquteqarneq saqqummiunneqartoq ukiuni qaninnerni pisussaammat, tigussaanerusumik qanoq iliortoqassanersoq pillugu Jensen itisileeqquarput:
Anngiortumik aningaasarsiupiluffiit ingerlarsorput
- Ajoraluartumik manna tikillugu paqumigineqartutut inissisimapput anngiortumik aningaasarsiupiluttut, taamaattoqarnera uagut akiorniarniarparput. Tassami ajoraluartumik sumi tamani periarfissaasinnaasut tamaasa atorlugit nammineq aningaasanik kaasarfinnut ikioraanissaq kisiat eqqarsaatigalugu qernertuliortoqarpoq, taakkulu inuiaqatigiittut aaqqissuussaanerput minnerpaamilluunniit soqutiginagu nammineq pinnatassatik kisiisa eqqarsaatigisarpaat, taakkoqqissaallu atugarissaarnissamut eqqanaarinninniutaasut pisortanit aningaasalersorneqartut atueqataaffigivaat, Erik Jensen avaqqutaarinngivilluni akivoq nangillunilu:
- Taamatut anngiortumik iliortut eqqarsaatigineq ajorpaat assersuutigiinnarlugu sulisartut akissarsiaminnit ulluinnartik ataqatigiissinnarsaralugu tamaviaartut. Eqqarsaatigineq ajorpaat sulisartut akileraartarnermikkut atugarissaarnissarput eqqanaarinneqataaffigisaraat, aammalu sulisartut taakku akiligassatik akilereeraangamikkit sinneruttut atorlugit ulluinnarni nioqqutissat akitsuuteqartut pisiarisaraat. Sulisartut tamaviaartut illuatungaanilu imminuinnaq eqqarsaatigalutik aningaasarsiupiluttut aningaasarpassuarnik qernertunik qalooripput inuiaqatigiillu kivinniagassaannut tunniusseqataanatik.
Tigussaasunik assersuuteqalaarsinnaavit?
- Aap, assersuutigiinnarlugu ilisimatinneqarnikuuvugut Nuummi inissaaleqinerujussuaq atornerlullugu inissianik ineeqqanillu attartortitsisoqartartoq akiliisitserujussuarluni, taakkulu isertitatik aaqqissuussaanitsinnut anngunneq ajorpaat. Tamatuma saniatigut aamma paasivarput anngiortumik sulisitsisoqartartoq akilernerluilluni, allaat SIK malillugu akissarsiat ataallugit akunnermusiaqartitsisoqartarluni, sulisut taakku akilernerlutat "akileraartinneqartarput" akileraarutissaraluili namminneq kaasarfimminnut ikiortartaraat aamma paasitinneqarpugut. Kiisalu aamma paasitinneqarpugut ulluinnarni nioqqutissanik "niuertutut" tuniniaasoqartartoq, kaaviiaartitalli aaqqissuussaanitsinnut nalunaarutigineqarneq ajorlutik, Erik Jensen Sermitsiaq.AG-mut nassuiaavoq.
Anngiortumilli aningaasarsiupiluttoqarnera qanoq akiorniarneqassanersoq Jensen-ip itisilikkamik oqaatigiumanngikkallarpaa. Paqumisuutigisatulli oqaluuseriumanngisaq taanna pillugu erseqqissuliornermigut taamaaliortartut nalunngeqaginnisuteqarsimagunik nalunngeqatiginnissutaatigut oqariartorfigalugit iliuutsitik pillugit eqqarsaqqeqquai:
- Atugarissaarneq iluatsittumik ingerlakkusukkutsigu, siuariartorusukkutta, inuiaqatigiit kalaallit ingerlalluartikkutsigit, meeqqat inuusuttullu toqqissisimallutik peroriartornissaat qulakkeerinneqataaffigerusukkutsigu, utoqqaat toqqissisimasumik inuuneqartikkusukkutsigit, innarluutilittagut pitsaasumik atugaqartikkusukkutsigit aammalu peqqinnissaqarfipput ingerlalluartikkusukkutsigu, kiisalu minnerunngitsumik naalagaaffinngorusukkutta, taava tamatta inuiaqatigiit akissaqarnissarput qulakkeerniarlugu aningaasaqarnitta nukittorsarneqarnissaa peqataaffigisariaqarparput, Erik Jensen Sermitsiaq.AG-mut oqarpoq.