Erik Jensenip illersornissamut ilinniartitsisoqartarnissaa tikilluaqquaa

Marlunngornermi nalunaaquttap ataatsip kingona naalakkersuisunngortut nutaat ssaqqummunneqassapput, Sermitsiaq:AG-llu tusarfigisimasaa naapertorlugu, Siumumeersoq Vivin Motzfeldt nunanut allanut tunngasutigut naalakkersuisunngortinneqassaaq. Susassaqarfik pineqartoq naalakkerlsuisooqatigiikkunnaartut arlalitsigut aaqqiagiinngissuteqarfigisarsimavaat.

Siorna qinersisoqarnerata kingornatigut qaammatini siullerni Pele Broberg Naleqqameersoq nunanut allanut tunngasutigut naalakkersuisunngortinneqarpoq, arlalitsigulli aaqqiagiinngissuteqartoqartareersoq Múte B. Egedep nammineerluni susassaqarfik akisussaaffigilerpaa. Naalakkersuisooqatigiilersut nutaat sillimaniarnermut politikki pineqartillugu imminnut qaninnerupput, Siumumi siulittaasoq erseqqissaavoq.

- Nunanut allanut sillimaniarnermullu politikkikkut sammineqartut Inatsisartunit partiinit tamanit isumaqatiginninniutigineqartussaapput. Siammasissumik isumaqatigiissuteqartoqassaaq. Sorpassuartigut IA isumaqatigisupilussuuarput, partiillu tamarmiullutik Kalaallit Nunaanni sakkulersortoqannginnissaa isumaqatigiissutigaat, Erik Jensen Sermitsiaq.AG-mut oqarpoq.

Siumut oqartussaaffimmik angerlaasserusuttoq

Taassuma itisiliilluni oqaatigaa, Siumumit susassaqarfimmut atatillugu partiip anguniagai malinneqartut.

- Siumumit anguniagaavoq nunanut allanut tunngasutigut oqartussaaffimmik tigusinissaq. Tamanna anguniagaraarput annertooq. Tigusinissarli qaqagu qanorlu pissanersoq pillugu naalakkersuisooqatigilikkatsinnut oqaloqatigiissutigissavarput.

Kalaallit Nunaata nunanut allanut sillimaniarnermullu politikkikkut oqartussaaffik tigussappagu, Erik Jenseni Pele Broberg assigalugu isumaqarpoq, nunat kangitsinniittut isumassarsiorfigissagivut. Islandimi sineriak civil coast guardi atorlugu nakkutigineqarpoq, Erik Jensenilu isumaqarpoq, danskit illersornissaqarfiat nunatta killeqarfiinik nakkutilliijunnaassappat tamanna aqqutissaasinnaasoq.

Partiimi siulittaasup erseqqissaassutigaa, Kalaallit Nunaat nammineerluni soorunami Issittumut periusissiaqassasoq, oqaaserineqartartorlu "uagullu peqataatinnata uagut pilluta oqallittoqartannginnissaa" uteqqillugu.

Kangerlussuarmi ilinniartitsisoqartalernissaanut piareeqqasut

Erik Jensenili Kangerlussuarmi illersornissamut ilinniartitsisoqartalernissaanut piareeqqavoq. Danmarkimi naalakkersuisut Issittumi illersornissaq annertusarniarlugu piginnaasanik annertusaanissamut !,5 milliarder koruuninik atugassiisoqassasoq aalajangermassuk siunnersuutit tamanna ilagisimavaat.

Taamanikkut Pele Brobergip akerliilluni oqaatigaa, Kalaallit Nunaannit upalungaarsimasussanik ilinniartitsisoqarnissaa danskillu illersornissaqarfiata nunamiiginnarnissaa kissaatigineqanngitsut. Siumumeersullu Jess Svanep tamanna akerlilerlugu nalunaarutigaa, kalaallit inuusuttut illersornissap iluani ilinniartinneqartarnissaat Siumumit ajoriffissaqartinneqanngitsoq - aamma maani nunami.

Erik Jensenillu tamanna isumaqatigigaa.

- Kangerlussuarmi illersornissamut ilinniartitsisoqartarnissaa isumaqatigaarput, piginnaasanilli annertusaaniarnermi immikkuualuttut piffissami aggersumi naalakkersuisooqatigisatsinnut oqaloqatigiissutigissavagut.

Piginnaasanik annertusaaniarnermi siunnersuut alla tassaavoq, Kalaallit Nunaata silaannartaanik dronit atorlugit nakkutilliisoqarnerulernissaa. Siunnersuut immaqa Ukrainemi sorsuttoqarnera pissutiginerullugu Danmarkimi naalakkersuisut suli angorusutaannut ilaavoq.

Suliamut tassunga atatillugu Erik Jensen erseqqissumik paasisaqarsimanngilaq

- Droninut atatillugu immikkuualuttunik paasisaqarsinnaasimanngilanga, sillimaniarnermut politikki matoqqasumik ingerlanneqartarmat tassunga atatillugu suli paasisaqarsinnaasimanngilanga.