Erik Jensenip VM-ertunik isiginnaarneranit paasissutissat
Aningaasaqarnermut Akileraartarnermullu Naalakkersuisup Erik Jensenip Stavangerimi VM-imi nunarput unammimmat, 29. novemver isiginnaaqataasimasoq, allagaatinik takunnissinnaaneq atorlugu Sermitsiaq.AG paasisaqarpoq.
Erik Jensen Stavangerimi assammik arsartartut unammersuarnerannut peqataannginnermini Københavniliaqqaarsimavoq ataatsimiissalluni, kingornalu Københavnimiit Stavangerimut utimullu angalalluni unammersuarnerni isiginnaariarluni.
Københavnimi ataatsimiinnermut atatillugu Erik Jensen Stavangerimut angalaniarluni aalajangerpoq. Taamaasilluni angalanermut aningaasartuutit naalakkersuisunut ilaasortaatitami Múte B. Egedep Aqqaluaq B. Egedelllu VM-imi peqataanerannut sanilliullugit annikinnerujussuanngorsimapput.
Ataatsimiinnerit amerlasuut
Københavnimi Erik Jensenip akileraartarnermut ministeri Jeppe Bruun, aningaasaqarnermut ministeri Nicolai Wammen kiisalu aningaaseriviup pisortaa Christian Kettel ataatsimeeqatigigai, aningaasaqarnermut naalakkersuisoqarfik ilisimatitsivoq.
Københavnimiit Stavangerimut utimullu angalaneq 4.719 koruuninik akeqarsimavoq, akunnittarfimmut unnuisarnermullu Namminersorlutik Oqartussat 2.580 koruuninik akiligaqarsimallutik. Tamatumunnga ilanngullugit ullormut aningaasarsiat 545 koruunit VM-imilu peqataanissamut bilitsi 435 koruunit aamma akilerneqarput. Erik Jensenip VM-imi peqataaneranut akiligassat katillugit 8.279 koruuniupput. Angalanermit naatsorsuutini Nuummiit Københavnimut angalanermut aningaasartuutit ilanngunneqanngillat.
Aningaasaqarnermut Naalakkersuisoqarfik naapertorlugu Erik Jensen kisimiilluni atorfilittat ilaginagit Stavangerimut angalasimavoq „angalanissaminut aningaasartuutit sipaarniarlugit“.
Siunertaq
Erik Jensenip Stavangerimut angalaneranut suna siunertaanersoq Sermitsiaq.AG-p itinerusumik paasiniarpaa, tamatumunngalu atatillugu uku akineqarput:
- Erik Jensenip ilaatigut TAAK (Kalaallit Nunaanni Assammik Arsartartut Kattuffiat) Stavangerimi naapippaa, aamma assammik arsarluni nunanut allanut unammisartut Stavangerimi VM-imi peqataanerat pillugu unammineq najuuffigaa, ilaatigut Naalakkersuisunut siulittaasup tulliatut aamma aningaasaqarnermut akileraartarnermullu naalakkersuisutut sinniisuugami.
Politikerit, ingammik Erik Jensenip, VM-imut isiginnaartutut peqataanera inuit attaveqaqatigiittarfiini oqallisaangaatsiarpoq, tassanilu amerlasuut Namminersorlutik Oqartussat taamatut aningaasartuuteqartinneqarnerat isornartorsiorpaat.
Tamannalu Erik Jensenimut sunniuteqangaarsimagunarpoq.
Sermitsiaq.AG-p allagaatinik takunnissinnaaneq pillugu apeqquteqaat akineqarmat, Demokraatineersup Anna Wangenheimip paragraf 37 naapertorlugu Naalakkersuisunut apeqqutit arlallit apeqqutigai, taakkualu allagaatinik takunnissinnaaneq pillugu apeqquteqaat akineqarpoq.
Akilerneqartut taarserneqassappat?
Anna Wangenheim aperivoq Erik Jensenip angalaneranut aningaasartuutai taarserneqassanersut, “paasineqarpat angalaneq paasisassarsiornermut attuumassuteqarnani arnallu assammik arsarlutik nunarsuarmi pissartanngorniunneranni isiginnaariaannarluni angalanerusoq”.
- Aningaasaqarnermut Akileraartarnermullu Naalakkersuisup TAAK-ip siulittaasuanik ataatsimeeqateqarnissaq siunertarimmagu tamanna pissutissaqanngilaq. Demokraatit isumaqarput Nuummi taamatut ataatsimeeqateqarnissaq tulluarnerujussuussasoq, Anna Wangenheim allappoq itisiliillunilu:
- Paasinngilara sooq Naalakkersuisut ingammillu Aningaasaqarnermut Akileraartarnermullu Naalakkersuisoq angalaneq pillugu ammanerusumik oqaaseqarsinnaannginnersut. Maannakkorpiaq ima isikkoqarpoq Aningaasaqarnermut Akileraartarnermullu Naalakkersuisoq VM-imi isiginnaartuuinnartutut isikkoqartoq, tamannalu nammineq akilersimaguniuk ajunngilaq. Akiligassaq tamanna innuttaasunit akilerneqartussaanngilaq.
Erik Jensenip novembarip 29-ani isiginnaagaa tassaavoq assammik arsarluni nunanut allanut unammisartut Norgemut unamminerat. Kalaallit Nunaat 43-11-mik ajorsarpoq.