Erinarsorneq aqqutigalugu kalaallisut ilinniartut

Nuuk Internationale Friskolemi kalaallisut ilinniarneq nuannertillugulu ilikkagaqarnartinneqarpoq naak aammattaaq oqaatsit siullertut oqaaserinngikkaluarlugit.

Nuuk Internationale Friskolemi 4. klassimi atuartut namminneq kalaallit erinarsuutaat ilisisarisimaneqarluartut atorlugit erinarsuutigalutik isiginnaagassiornertik nuannarisimavaat, kiisalu erinarsuutigalugu isiginnaagassiami inuttaasut atuartut nammineq pilersissimavaat, tassani naapinneqarsinnaapput Harald Blåtand, Darth Vader aamma Qivittoq.

- Uanga nammineerlunga kalaallit oqaasii nipilerneq aqqutigalugu ilikkarpakka. Oqaatsinik ilikkarniarnermi aqqut qaninnerpaaq arlalitsigut tassaasarpoq isumassarsiorneq aqqutigalugu piginnaasat atorneri kiisalu tassanngaannaq oqartarnerit, ingammik kalaallit oqaasii eqqarsaatigalugit, tamatumanimi atuartut kalaallit oqaasinik atuillutik aallartinnissaannut akimmisaarfiit arlallit qaangerneqaqqaatariaqarput, atuartut iliniartitsisuat Nina Kreutzmann Jørgensen oqarpoq.

Ukiumi atuartitsiffiusussami Nuuk Internationale Friskolemi kalaallit oqaasiinik atuartitsinerup atuartunut amerlasuunut kalaallit oqaasiinik tunngaviusumik atuisuunngitsut anguniakkatut naleqqussarneqarnissaa sulissutigineqarniarpoq. Atuarfik taamatut iliorniarpoq ilaatigut kommunip atuarfii aamma ingerlatsiviit allat kiisalu inuit piginnaasallit kalaallit oqaasiinik atuisuunngitsunik ilinniartitsinermi peqataatinniarnerisigut.

- Tamatuma saniatigut aappaagu nipilersornermut ilinniartitsivimmik iniuteqalissaagut, taamaattumik uanga neriuutigaara aamma augut nipilersorneq aqqutigalutigu atuartut kalaallit oqaasiinik ilikkarnissaannut ikiorsinnaassallutigit, atuarfiup pisortaa Nina Stilling oqarpoq.

Erinarsuutigaluni isiginnaagassiaq atuartut ilaqutaannut aamma ikinngutaannut takutinneqassaaq. Aningaasat isernermi akiliutitut aamma tamatuma kingorna basareqartitsinermi isertinneqartut Mozambique meeqqat atuarnerannut ikiuiniarnermut tunniunneqassapput.