Erneeraq erfalasumik tigumiartuuvoq
Canadap premierministeriata Stephen Harperip Arctic Winter Gamesit 20-issaat ammarpaa.
35-inik ukiulik Erneeraq Lindenhann kalaallit erfalasuannik tigumiarluni siulersortaavoq kalaallit Arctic Winter Gamesimi peqataasut Yellowknifemi inersuarmut sukuutsertarfimmut, Arctic Winter Gamesip ammarnersiorneqarfianut, isaammata.
Ukioq manna Arctic Winter Games nalliuttorsiortumik ingerlanneqarput, tassa Arctic Winter Games 20-issaa ingerlanneqarmata. Aamma naleqqulluartorujussuuvoq Stuart Hodgson ammaanersiornermi ataqqinaammik qaaqqusaanera.
Tassami Stuart Hodgson, Nordvestterritoriameersu aamma James Smithip Yukonimeersup, ukiut 38-it matuma siornatigut siullersaallutik Arctic Winter Games, 1970-imi ingerlanneqartoq, sulissutigisimavaat
– Eqqarsaatigeriarsiuk Arctic Winter Games siulleq nunanit pingasunit timersortartunillu untritilinnik marlussunnik peqataaffigineqarluni ingerlanneqarmat. Maanna nunat qulingiluat timersortartullu 2.000-it peqataapput, Arctic Winter Gamesip nunani tamalaani komitéani præsidenti Gerry Thick ammaanersiornermi oqalugiarnermini oqarpoq.
Issittup ulloriai
Bodyguardsit scenemut inissipput Canadap premierministeria Stephen Harper oqaluttafimmut qaqimmat. Taanna illoqarfimmit naalakkersusioqarfimmit Ottawamit Yellovknife-mukarsimavoq issittormiut ukiumi unammiuaarnerisa 20-issaata malunnartinneqarnera peqataaffigiartorlugu.
– Neriuppunga Arctic Winter Gamesimi ullut puigunaatsut atorumaarisi inuunissilu sinneranut puigukkiussillusi, Stephan Harper oqarpoq.
– Issittup qilaani ullorissani qaamanersaavusi, oqalugiarnini naggaserlugu oqarpoq.
Tamanna sioqqullugu Dene indianerit indianerisut qilaatersorlutik Ammaanersiornermi qinnussipput.
Rekordiliiniarneq
Maanna Arctic Winter Games aallartipput, ataasinngorpallu pissanganartorujussuussaaq Kalaallit Nunaata erfalasumik tigumiartua Erneeraq Lindenhann Arctic Sportsini Air Planemi rekordiliisinnaassanersoq.
Maanna rekordiusoq 28,98 meteriuvoq. Ataasinngormat unnukkut Erneeraq Lindenhann rekordileeriassaaq. Yellowknifemut allanngitsiarnermi sungiusarnermi 50 meterit sinnersimavai.
Badmintonimi nerrivimmilu arsaararnermi aaallarniutaasumik unammiuaarnerit ingerlanneqassapput arsaattartullu ullaarnganiit unammiuaassapput, tamatumani nivissat nukappissallu arlaleriarlutik unammissallutik.
Volletballertartut aamma aallarniutaasumik unammissapput. Nukappissaq Nunavut, Yukon aamma Nordvestterritoriet unammissavaat. Nivissat Nunavut, Alaska aamma Yukon unammissavaat.
Sisoraatinik oqilaniuttartut qangatut unammeqqaassapput. Inuusunnerpaat 2,5 kilometerimut oqilaniutissapput utoqqaanerpaallu 5 kilometerimut oqilaniutissallutik.