Ernineq: Qitornartaarnermi sulinngiffeqarneq ukioq ilivitsunngussasoq Wangenheim kissaateqarpoq
Anna Wangenheim (D) erninerminut atatillugu sulinngiffeqareerluni Inatsisartuni sulileqqippoq. Sulileqqinnermi kingorna kissaata siulleq tassaavoq qitornartaarnermut atatillugu angajoqqaat sulinngiffeqartarnerat sa. ak. 21-niit 37-nut sivitsorneqassasoq.
Bjørk Lange Olsenip Inatsisartuni paarlattaanera maanna qaangiuppoq, tassunga pissutaavoq Anna Wangenheim qitornartaarnerminut atatillugu sulinngiffeqareerluni Inatsisartuni Demokraatit sinnerlugit Inatsisartuni ilaasortatut utermat.
Uternermi kingorna apeqquteqaataa siulleq tassaavoq angajoqqaat qitornartaarnermut atatillugu sulinngiffeqartarnerisa sivitsorneqarnissaa sapaatip akunnerit 21-iniit 37-nut sivitsorneqarnissaa, taamaalilluni angajoqqaat naartunermut qitornartaarnermullu atatillugu ukioq ilivitsoq sulinngiffeqarsinnaalissasut.
Taassuma innersuussutigaa naartunermi, erninermi aammalu meeravissiartaarnermi sulinngiffeqarneq ullormusiaqarnerlu pillugit Inatsisartut Inatsisaat maanna angajoqqaat sapaatit akunneri 21-it sulinngiffeqarnissaannik qulakkeerinniffigineqaqqasut.
- Matumani erninermut atatillugu sulinngiffeqarnermut sapaatit akunneri 15-it siulliit ilaatinneqassapput, tamannalu isumaqarluni angajoqqaat ataatsimut isigalugit meerartaartik ernereernermiit sapaatit akunneri 36-it angerlarsimaqatigisinnaagaat.
- Uanga ernereernermi ukioq ataaseq angerlarsimaqatigisinnaanissaanut pisinnaatitaaffinngornissaa takorusuppara, taamaattumillu angajoqqaat sulinngiffeqartarnerat maannakkut sapaatit akunneri 21- iusuniit 37-nut sivitsorneqarnissaa kissaatigaara, angajoqqaat meerartaaminnik ukioq ataaseq angerlarsimaqateqarsinnaaneranik kinguneqassalluni.