Ernisoqartarnera: Ilaquttat ilaginagit meerartaarneq qanoq sunniuteqartarpa
Naalakkersuisut ernisarfinnik misissuineq aallartissimavaat, tassani ernisussiortut misilittagaat ilanngunneqarsimallutik. Misissuinikkut ernisarfinnik eqiterisimanerup kinguneri qulaajaaffigineqassapput.
Nuna tamakkerlugu erniartortartunut sullissisarneq pillugu misissuititsinerit Naalakkersuisunit aallartinneqarsimapput. Qitiusumut erniartortitsisarnerup ilaqutariinnut immikkullu ilisimasalinnit erninermut atatillugu kingunerluutaasinnaasut pillugit sullisseriaaseqarnerup ersarissarneqarnissaa misissuititsinermi siunertaavoq.
Ernisussiortut misilittagaat tassani ilanngunneqarsimapput. Peqqissutsimut Naalakkersuisoq Kirsten L. Fencker, Pipaluk Lynge-Rasmussenip paragraf 37 naapertorlugu apeqqutaasunut akissuteqarluni ilisimatitsivoq.
Siunissami erniartortitsisarnissaq eqqarsaatigalugu pilersaarusiornissamut aaqqissuussinissanullu immikkoortortaqartitsinermut ineriartortitsinermullu periarfissallu eqqarsaatigalugit misissuititsineq iluaqutaassaaq. Ernisussiortut aamma tassani ilaatinneqassapput, fKirsten L. Fencker nassuiaavoq.
Peqqissutsimut Naalakkersuisup naatsorsuutigaa, misissuinermi paasisat Naalakkersuisunut 2023-p qiteqqunnerani saqqummiunneqassasut.
Erniartorlutik aallartartut
Inatsisartuni ilaasortaq Pipaluk Lynge-Rasmussen ernisarfinnut, ernisartut amerlassusaannut, ernisussiortutut ilinniagaqarsinnaanermut arnallu ilaquttatik qimallugit erniartorlutik aallartarneranni kinguneqaataasartunut tunngatillugit arlalinnik apeqquteqarsimavoq.
Peqqissutsimut Naalakkersuisup ilisimatitsissutigaa, 2019-imi inunngortut 849-simasut. Taakkunannga 605-it, tassa inunngorsimasut 71 procentiisa missaanniittut.
- Meerartaartunit 257-it Nuummi najugaqartuupput
- Arnat erniartortut 348-t sinerissameersuupput
Arnat anerlarsimaffitsik qimallugu allamut erniartortarnerat inuiaqatigiinnut qanoq akeqartarnersoq naatsorsorneqarsimanngilaq, erniartortut erniffissami najugaqarallartarneri allanngorartuummata.
Ilanngullugu ilisimatitsissutigineqarpoq, nunatsinni naalungiarsuit toqusartut ukiut 20-t kingulliit ingerlaneranni ikilisimasut.
- Piffissallu taassuma ingerlanerani naartusunik isumaginninnerup allulluarneqarnerulernerata kingunerisaanik aaqqissuussaaneq pitsanngorsaavigineqarsimavoq, Naalakkersuisoq ilisimatitsivoq.
Najoqqutassat atuuttut malillugit ullumikkut piumasaqaataavoq, inunngorfissami erninissamut atatillugu piareersimasoqartarnissaa, tassa minnerpaamik nakorsaq ernisumik peruluttoqarsimappat pilattaalluni ernisitsisinnaasoq, peqqissaasoq sinitsitsisinnaasoq, aaviisarfimmiittartussatut ilinniagalik kiisalu ernisussiortoq sulisorineqartussaapput.
Ilinniartitaanermut seks millioner koruunit
Ilinniartitaanermut Naalakkersuisoqarfik Pipaluk Lynge-Rasmussenip paragraf 37 naapertorlugu Kirsten L. Fenckerimut apeqqutaanut akissuteqarnissamut tapiissuteqarsimavoq. Naalakkersuisoqarfimmit ilisimatitsissutigineqarpoq, ernisussiortunngorniartunut ilinniartitaaneq eqqunneqassanersoq Naalakkersuisuniit isummerfigineqarsimanngitsoq. Taamaattorli ernisussiortunngorniartunut i1inniartitaasinnaanerup ineriartortinneqarnissaa periarfissaqartoq. Tassami peqqinnissamut tunngasutigut immikkut i1isimasalittut, peqqissaasutullu ilinniagaqarsimanissaq nunami maani periarfissaareermat.
- Taamaattorli inerisarneqassaaq, illut ilinniartitsiviusussat, ernisussiortunngorniarneq naqqaniit ilinniartitsisussat, atortorissaaruserisussat atorfinitsitseqqaarnissaat aamma atortussaasinnaasut allat ilanngunneqaqqaassammata, ilisimatitsissutigineqarpoq.
Nunami maani ernisussiortunngorniarfimmik ineriartortitsineq ukiut qulit missaannik sivisussuseqassaaq. Ernisussiortunngornianut ilinniarfissap ineriartortinneqarnissaanut qanoq aningaasartuuteqarsinnaanera misissorneqasimanngilaq, peqqissaasunngorniarfimmulli ukiumut 6.357.000 koruunit missaannik aningaasaliissuteqartarnertulli akeqassangatinneqartoq ilisimatitsissutigineqarpoq.