Ernisussiortut Kattuffiat ataqqinaammik nersornaatisisoq
Nunatsinni ernisussiortut kattuffiat aningaasaateqarfimmit "En god start i livet" 26. september ataqqinaammik nersornaatisitinneqassaaq.
Aningaasaateqarfiup ”En god start i livet” kalaallit Ernisussiortut Kattuffiat ataqqinaammik nersornaasissallugu aalajangiuppaa. Nunatsinni ilaqutariit aallarlutik erniartortariaqartarnerat, taamaaliortariaqarnerullu nassatarisaasa sammineqarnissaat qasusuillutik sulissutigisimammassuk nersornaammik tunineqartussatut aalajangiunneqarsimapput.
Ernisussiortut Kattuffiata siulittaasuata, Anne Schurmannip ataqqinaammik nersornaat 26. september tigussagaa, kattuffik tusagassiorfinnut nalunaaruteqarpoq.
- Maniguulluta tulluusimaarlutalu ataqqinaammik nersornaat tigussavarput. Ernisussiortut inuunerup iluamik aallartinnissaanut qulakkeerinneqataasuupput, taamaattumillu ernisussiortutut ilinniarsimasumik paaqqutarineqarluni inuunermik aallarniinissaq inuunerup aallartilluarnissaanut attuumassuteqarluinnarpoq, EK-mi siulittaasoq Anne Schurmann oqarpoq.
Najukkaminni ernisarusuttut
Kalaallit ernisussiortut ilaqutariit najukkaminni ernisinnaasannginnerat, tamassumalu kingunerisartagai, ukiuni kingullerni ukkataraat.
Misissuinerit takutippaat, toqqissisimaffigisaq qimannagu erninermi, ernereernerullu kingorna suliaritittariaqarnerit ikinnerusartut.
- Naartusut affaasa missarluinnai erniniarlutik aallartariaqartarput, amerlasoorpassuimmi najugaqarfigisaminnni, najugaqarfigisamulluunnit qanittumi ernisussiortumik peqarneq ajorpoq – tamannalu naartup paaqqutarineqarneranut aammalu ernisussiortut suliffimminni atugarisaannut ajornaatsuinnaanngilaq, Anne Schurmann oqarpoq.
Dronning Ingridip Napparsimmavissua sapaatip akunnerani matumani ilisimatitsivoq sulisussatigut amigaateqarneq pissutigalugu erniartortussat nalinginnaasumit amerlanerusut Nuummut aasaq manna erniartortinneqassasut.
Ernisussiortut Kattuffiat siorna ataatsimeersuartitsivoq, ataatsimeersuarnermilu naqissorneqarpoq ernisussiortut amerlanerusut pisariaqartinneqartut, Nunatsinni meeqqat ukiumut 800-t missaat inunngortarput.
- Ernisussiortut erninerup nalaani taamaallaat pingaaruteqanngillat, aammali annertuumik naartunerup nalaani minnerunngitsumillu angajoqqaanngortussanngornermut piareersarnermi pingaaruteqarluinnarput. Ernisussiortumik paaqqutarineqarsinnaanissamut ernisussiortut suliniutaat kisimi naammanngilaq, politikkikkulli piumassuseq aamma pisariaqarluinnarpoq, Anne Schurmann oqarpoq.
Ernisussiortut Kattuffiata angajoqqaanngortunut atugassarititaasut pillugit saqqummiussisarnertik suli ingerlateqqissagaat, Anne Schurmann ilisimatitsivoq.