Ernumasoqaraluartoq: "Piumassutsimik akitsuusiisitsisinnaanermut" siunnersuut akuerineqartoq

Inatsit, assersuutigalugu sikaritsit 800-nut piumassutsimik akitsuusiisitsisinnaanermut tunngasoq, Inatsisartunit akuersissutigineqarpoq. Inatsit naapertorlugu innuttaasut immiaaqqanik, viinninik imigassanillu kimittuunik allatigut nunatsinnut eqqussisinnaanerannik aamma periarfissiivoq.

Inatsisartut nunatsinni nunanut allanit tikiffiusartuni mittarfeqarfinni "piumassutsimik akitsuusiisitsisinnaanermut" inatsit sapaatip akunnerani uani akuersissutigaat.

Aaqqiissut isumaqarpoq innuttaasut maannakkumit tallimariaammik amerlanerusunik eqqussassanik pisisinnaalersut - soorlu sikaritsit, immiaaqqaat imaluunniit viinnit - mittarfimmilu piumassutsimik akitsuuserlugit.

Tamanna isumaqarpoq sikaritsit 1.000-it pisiarineqarsinnaalissasut - taakkunannga 200-t akitsuuserneqarlutik, sinnerlu 800-t mittarfinni piumassutsimik akitsuusertillugit nalunaarsorneqartassasut.

Nammineq eqqussisinnaaneq atulersinneqarpoq - akisussaqaarli

Siunnersuummi immikkoortut ilaanni innuttaasut immiaqqaanik, viinninik imigassanillu kimittuunik nammineq eqqussisinnaalernerannik ammaasisoqarpoq. Nammineq eqqussinermi qaavatigut akitsuut akip 50 procenterissavaa, saniatigullu kiffartuunneqarnermi 250 koruuninik akeqassalluni.

Taamaammat akikinnerulernavianngilaq, innuttaasulli nunatta avataani niuersinnaalernerminni toqqagassaqarnerulissapput. Qaavatigut akitsuusersuineq sullissinermullu akiligassaq pissutigalugu siunnersuut Demokraatinit taperserneqanngilaq, naak innuttaasut nammineerlutik eqqussisinnaalernissaat partiip siulittaasuanit Jens-Frederik Nielsenimit siornatigut saqqummiunneqarnikuusimagaluartoq:

- Siunnersuutigisimasanni siunertaasimavoq innuttaasut kiffaanngissuseqarnerullutik toqqagassaqarnerulernissaat. Naalakkersuisulli periarfissaq atorluaannarlugu akiliuttakkatigut akitsuutitigullu innuttaasut kaasarfianiit aallerfissatut periarfissarsiuutilerpaat, Aningaasaqarnermut Akileraartarnermullu Ataatsimiititaliami ikinnerussuteqarluni oqaaseqaammi Jens-Frederik Nielsen inatsit pillugu allappoq.

Peqqinnissaq pillugu ernumasoqarnera ilalinngikkaa

Aningaasaqarnermut Akileraartarnermullu Ataatsimiititaliap inatsisissatut siunnersuutip suliarinerani siunnersuutip kingunissai arlallit ernumanartoqartillugit oqariartuuteqarpoq.

Ilaatigut ernummatigineqarpoq nalinginnaasumit tallimariaammik annertunerusunik imigassanik aalakoornartortalinnik eqqussisinnaalerneq, peqqinnissaq aamma imigassanik aalakoornartunik politikkimut sunniuteqarnissaa.

Naalakkersuisulli taama ernumassuteqanngillat. Naalakkersuisoq Erik Jensen (S), allakkatigut akissuteqarluni allappoq nioqqutissat akitsuusernagit nunatsinnut eqqunneqartartut annertunerulersinneqanngitsut.

- Tamatuma saniatigut inatsit nioqqutissanik amerlanngitsunik, tikinnermi akitsuuserneqartussanik nassarsinnaanermik periarfissiivoq, ullumikkutut nioqqutissat arsaarinnissutigineqarlutik aserorterneqarlutillu akiliisitsiviusarnerat qimallugu, Erik Jensen ataatsimiititaliamut akissuteqarpoq.

Nakkutilliineq qanoq akeqassava?

Ataatsimiititaliap ilanngullugu ernummatigaat allannguummi nakkutilliineq annertunerulertariaqartoq, tamannalu isumaliutissiissummi aamma allanneqarpoq.

Naalakkersuisut ilisimatitsipput imigassanik nammineq eqqussinermi malittarisassanik aqutsinermut IT-milu atortunik inerisaanermut aningaasat 500.000 kr atorneqassasut.

- Taakku saniatigut tikinnermi kajumissuseqarluni akitsuusiinermut 2 mio. kr.-nik aningaasartuutaanerusutut missingerneqartuni, nakkutilliineq, malittarisassanik atuutsitsineq IT-millu ineriartortitsineq ilaapput, naalakkersuisoq allappoq ilanngulluguli nunanit allanit tikittunut nakkutilliineruneq annertusarneqarnissaa kissaatigineqartoq, tamatumunngalu ilanngaaserisut sisamat pisariaqartinneqartut ilanngullugu, taakkununngali suli aningaasaliisoqarsimanngitsoq.

Powered by Labrador CMS