Ernuttut: Angajoqqaat imerniartarfimmi, meeraat imminnut paarisut
Meeqqat inuusuttuaqqallu tallimat Sisimiuni angerlarsimaffiup avataanut inissinneqarput sapaatip akunnerata naanerani. Meeqqat illoqarfimmi unnuami imminnut paarisimapput, angajoqqaavi imerniartarfimmi ernguttut.
– Akissarsisoqarsimanera assut sapaatip akunnerata naanerani malunnarsimavoq. Aalakoortorpassuupput allatullu ajornartumik meeqqat inuusuttuaqqallu tallimat inunnik isumaginninnermi oqartussanut tunniuttariaqarsimavagut. Meeqqat imminnut illoqarfimmi unnuami paaripput angajoqqaavilu imerniartarfimmiillutik. Meeqqat inuusuttullu tallimat angajoqqaarsiaagallartunut inissinneqarput. Ajoraluartumik oqaatigisinnaanngilara meeqqat qanoq utoqqaatiginersut, taama Sermitsiaq.gl-imut oqarpoq Sisimiuni politiini pisortaagallartoq Karl Jørgen Lennert.
Sisimiuni politiit sapaatip akunnerata naanerani ulapaarsimanertik nalunaarutigaat angerlarsimaffinni eqqissiviilliornerit amerlasimallutik.
– Qujanartumik ajornerusumik pisoqanngilaq ukua meeqqat inuusuttuaqqallu imminnut paarisut eqqaassanngikkaanni, taama Karl Jørgen Lennert oqarpoq.