Esmar Bergstrøm: Sulinermi pissutsit naammaginanngitsut
– Inatsisartut sulinerminni atugaat naammaginanngillat, suliassat iluamik pulaffigineqasinnaanngippata, IA-miit Esmar Bergstrøm oqarpoq.
– Ataatsimiinnerup ullut aappassaanni Siumumiit Atassutikkullu affaanniit pissaanermik takutitisoqareerpoq, taakkua kissaatigaat Qasigiannguani efterskolep sananeqarnissaanut aningaasaliissutit qaavatigut aningaasaliissuteqartoqarnissaa pillugu suliap ulloq taanna siullermeerlugu aappassaaneerlugulu suliarineqarnissaa, IA-meersoq Esmar Bergstrøm oqarpoq.
– Efyerskolet arlaannaataluunniit akerlerinngilaa, aamma Qasigiannguani eftyerskoleqalernissaa arlaannaataluunniit akerlerinngilaa. Kisianni Inatsisartut suleriaasiat naammaginarunnaavippoq, suliat aalajangiiffigitinnagit suunersut iluamik pulaffigineqarsinnaajunnaarpata.
– Nalinginnaasuuvoq aningaasaliissutinut ilassutissatut akuersissutissat aningaasaqarnermut ataatsimiitsitaliakkooqqaartarnerat. Ataatsimiitsitaliaq aalajangiitinnani apeqqutinik akisassanik pisariaqartitsivoq. Kisianni Siumukkut Atassutillu tamanna utaqqinianngilaat.
– Efterskolenik pisariaqartitsivugut, ksianni aamma ilumut inissianik pisariaqartitsivugut. Kisianni naalakkerssuisut pigineqatigiilluni illuliornermut 10-40-50-imut aammalu inunnut nuukkusuttunut inissialiortiternissamut aningaasaliissutinit tamarmiusunit tiguniarpaat.
Siunertanut taakkununnga 2007-immi aningaasaliissutaareersut qaavisigut immikkut 36,4 millioner koruunit akuersissutigineqarput, taamaalilluni inissianik sanaartornissamut katillugit 120 millioner koruunit atugassaallutik.
– 2008-mut aningaasaqarnermut inatsimmi naalakkersuisut aningaasat taakku 46,1 mio. kr.-inut appartippaat, tamatuma kingunerisaanik ukioq mannamut aningaasaliissutaareersut qaavatigut immikkut 35 mio. kr.-inik aningaasaleeqqittoqartariaqalerluni, kontu taanna 81,1 mio. kr.-inik imaqalerluniu. Aningaasat taakku naalakkersuisut maanna 25 mio. kr.-inik apparteqqinniarpaat.
Esmar Bergstrøn naapertorlugu naalakkersuisut oqaluttuarisinnaasariaqarpaat ilanngartuinerit tamakku Kalaallit Nunaanni inissialiortiternermut qanoq kinguneqassanersoq.
– Naalakkersuisut aamma oqaluttuarisinnaasariaqaraluarpaat inissialiortitsernissamut aningaasartuutissatut pilersaarutit ukiup ataatsip ingerlanerinnaani 50 procentimik ikilisarneqarsimatillugit pilersaarutit suut piviusunngortinneqarsinnaannginnersut, Kisianni tamanna naalakkersuisut kissaatiginaguluunniit pisinnaasimanngilaa.