Espersen: qallunaat akileraartartut mittatigineqarput
Qallunaat akileraartartut mittatigineqartutut misigisimanissartik piareersimaffigisariaqarpaat. Taama allappoq Søren Espersen Dansk Folkepartimeersoq.
Dansk Folkepartimi Søren Espersen isumaqarpoq Folketingemi amerlanerussuteqartut kanngusuttariaqartut.
- Naalagaaffiup nunap iluani pisuussutai kalaallinut tunniuppaat, taakkulu qanngusuttariaqarput.
Taama isummaminik allappoq tusagassiuutini arlalinni issuarneqartumik.
...Ukiup ataasiinnaap matuma siorna Dansk Folkeparti Folketingimi partiini kisiartaalluni isumaqarpoq qallunaat naalagaaffiani pisuussutit pigiinnarnissaat sorsuutigisariaqartoq. Taamaliornerummi takusinnaavarput naalakkersuisut Folketingimilu ilaasortat naalaannarsimanerisa kinguneri, tamannalu taaneqarsinnaannginnerpa Danmarkip oqaluttuarisaanerani naalakkersuinikkut kukkunerit annersaat?
Maannakkut siulittuutigisinnaavara maani nunatsinni naalakkersuinermik suliallit qarsupittut qaangiataarisullu isornartorsiorneqarnerat naakkiitaakkumaartoq, kingorna paasineqarpat Danmarkip aningaasartuutit tamaasa akilertarsimagaat, sulilu akilertarlugit, kalaallit 50.000-iinnannguit iluanaarlutik isertitassat tamaasa pisarlugit. Ukiup ataatsip matuma siorna Folketingip aalajangerpaa Kalaallit Nunaat nunap iluani pisuussutinik piginnittussaasoq, taamaattorli namminersorlutik oqartussat Danmarkimiit ukiumut 3,3 milliard kroninik pissarsisarput, tamannali ingerlaannassaaq Kalaallit Nunaata 7 milliard kronit nalinginut uuliamik pissarsisalernissaata tungaanut, Søren Espersen ilaatigut tunngavilersuivoq.