EU issittumi nunanut pimoorussili
Nunat avannarliit killiit siunnersuisoqatigiivisa EU issittumi nunat pillugit paasissutissiisarfimmik issittumilu nunat pillugit aallartitanik pilersitseqqullugu kajumissaarpaat.
Avannaamioqatigiit killiit siunnersuisoqatigiivi 30-it, danskit norgimilu inatsisartunut ilaasortat ministerillu avannaamioqatigiit killiit suliuniutitut pingaartitatik Nuummi sapaatip akunnerata tulliani oqaluuserissavaat.
Oqaluuserisassaasa ilagissavaat atlantikup avannaanni annaassiniartarnerit ajunaarnersuaqatillugulu ataqatigiissarisarnissaq. Savalimmiut, Kalaallit Nunaata Islandillu niueqatigiinnerisa siuarsarnissaat. Ataatsimoorussamik ilisimatusarnikkut suleqatigiinnerup nukittorsarnissaa kiisalu sumiiffinni aalisagaqassutsip ataqatigiinnerusumik ilisimatusarnikkut suleqatigiinnissaq. Klima, silap pissusia, avatangiisillu aamma pillugit oqaluuserineqassallutik. Siunnersuisoqatigiit ukioq manna ukiut qulinngortorsiornerat ataatsimiinnermi aamma nalliussineqassaaq.
Avannaamioqatigiit killiit siunnersuisoqatigiivisa siulittaasuata Jonathan Motzfeldtip, Avannaamioqatigiit killiit siunnersuisoqatigiivi sinnerlugit Den Europæiske Union kajumissaarniarpaa nunani avannaani pissutsinut aaqqiiviginiarneqartussatut suliarineqartunut malinnaaneroqqullugu, tamakku ilaatigut innunnit pilersitaasut tassaammata avannaamioqatigiit killiit ilaasortaaffiginngissaannersut.
EU issittumi nunanut piviusunik erseqqinnerusunillu sulissuteqqaqqullugu kajumissarneqassaaq tamatumuuna issittumi nunat EU-p allaffissoratigut nunanillumi allanit pimoorunniarneqarnerussammata. EU aamma kajumissaarneqarpoq nunat issittut pillugit paasissutissiisarfimmik pilersitsissasoq aamma issuttumi nunat pillugit aallartitassanik pilersitsissasoq.
Avannaamioqatigiit killiit siunnersuisoqatigiivi tassaapput suleqatigiit Savalimmiut inatsisartuineersut, Kalaallit Nunaata inatsisartuineersut kiisalu Islandip aamma inatsiartuineersut