EU kajumissaarneqarpoq avatangiisinut iliuuseqaqqullugu
Avatangiisinut iliuuseqarnissaq EU-p pingaartissavaa! Nunani tamalaaneersut, nunat EU-mi ilaasortat isorliunerusuineersut nunasiaatitoqaanneersullu ataatsimeersuartut, Kalaallit Nunaata peqataaffigisaani, taamatut naatsumik ersarissumillu nalunaajaateqarput.
Annonse
Ataatsimeersuarneq pivoq qaammammi uani siusinnerusukkut Réunion-imi, tamatumanilu sammineqarput silap allanngoriartornerata akiorneqarnissaaanut iliuutsissat kiisalu uumasut naasullu ilaasa nungunnaveersaartinnissaat.
Kalaallit Nunaannit peqataapput naalakkersuisunut ilaasortaq Aleqa Hammonde, Siumut, kiisalu inuiaat Inuit pisinnaatitaaffiinik suliniutiginnittoq ICC.
Peqataasut ilaatigut tassaapput nunat EU-mi ilaasortat nunasiaatoqaat - nunanik OLT-nik taaneqartartut- kiisalu isorliunerusuniitut arlallit, europami peqatigiinnut suli ilaasortaasut.
Franskit EU-mi siulittaasoqarfiat imminut pisussaatissimavoq ataatsimiinnermi angusat sulinermini ilanngunniarlugit tamatumanilu iliuuseqarnissamut siunnersuummik saqqummiussinissaminut.