EU-Parlamentimi Kalaallit Nunaat pillugu suliaqarusuttoq
Sissel van Run-Kvist Kalaallit Nunaanni inunngorpoq, Danmarkimili peroriartorluni. Europa-Parlamentimut sapaatiuppat maajip 26-ani qinersisoqalerpat qinigassanngortilluni sassarpoq.
- Danmarkimi Europamiluunniit inunngorsimanngilanga. Danmarkimiilli avannamut 3.000 kilomiiterisut ungasissusilimmiittumi Nuummi kusanarluinnartumi inunngorlunga, uummatinnilu Kalaallit Nunaat suli initoqaaq.
Sissel van Run-Kvist qineqqusaarutini video facebookiminut iligamiuk taama allappoq.
Sissel van Run-Kvist partii Radikale Venstre tunuliaqutaralugu Europa-Parlamentimut qinigassanngortippoq.
Radikale Venstre Europa-Parlamentimut qinersinermi kingullermi ataatsimik issiasuutitaqalerput, isumasiuinerulli kingulliup takutippaa partii maanna marlunnik issiasuutitaqaleratarsinnaasoq.
Kalaallit Nunaat naluneqanngitsutut EU-mi ilaasortaanngilaq, ukiunilu 34-ni ilaasortaasimanani. Danmarkimilu innuttaasut sapaatiuppat qinersilerpata, Kalaallit Nunaanni innuttaasut taaseqataasinnaanngillat.
Kalaallit Nunaata nipaa
Taamaakkaluartoq Sissel van Run-Kvist EU-Parlamentimut qinigassanngortippoq, kalaallillu Danmarkimi najugaqartut sapaatiuppat qinersiartorunik imminut taaqqulluni kaammattorlugit. Taanna isumaqarpoq Kalaallit Nunaannut pissutsinut EU suli sunniuteqarpallaartoq.
- EU Kalaallit Nunaanni pissutsinut suli sunniutilerujussuuvoq, assersuutigalugu puisit amiinit sanaanik nioqquteqarnermi, videoliamini oqarpoq.
Sissel van Run-Kvist parlamentimut qinigaassagaluaruni Kalaallit Nunaanni innuttaasut pillugit oqaaseqartartoorusuppoq.
- Europa-Parlamentimi ilaasortanngoruma Kalaallit Nunaat immikkut ukkatarerusuppara, qulakkeerusullugu inuiaqatigiit ikittunnguit Bruxellesimi puigorneqassanngitsut, naggasiivoq.