Facebook-ip Google-llu nakkutiginninneq oqaluttuarerusuppaat

Facebook-ip, Google-p it-millu ingerlatsivissuit allat, amerikarmiut aatsaat taama annertutigisumik nakkutiginninnermik mamianartuliorneranni sammineqalersimasut, maanna kissaatigilerpaat oqartussaasunut paasissutissanik qanoq akulikitsigisumik tunniussisarsimanerminnik oqaluttuarnissaminnut akulerineqarnissartik.
Taamaasiornikkut ingerlatsiviit tusaamanerlunneqalernerat anigorniarneqarpoq, tusaamanerlunneqalersimagamik paasissutissiissutigineqarmat amerikarmiut oqartussaasui killeqanngitsumik serveriini inunnut paasissutissanik pissarsisarsinnaasimasut.
– Google-p kisitsisaasa ersarissumik takutissavaat oqaatigineqartutut qinnuteqaatit tamakkua taama akulikitsigisumik tunniunneq ajorivut, ingerlatsivik allakkatigut ammasutigut allappoq.
Kinguninngua Facebook aamma Microsoft malinnaapput taamatupajaaq oqaaseqarlutik. Yahoo Twitterillu aamma taperserpaat ingerlatsiviit oqaluttuarisinnaassagaat oqartussaasut inunnut paasissutissanik serveriminnit pissarsiniaraangata.
Selskabit tamakkua sammineqalersimapput it-teknikerip 29-nik ukiullip Edward Snowdenip tamanut oqaluttuarimmagu amerikarmiut isertortumik paasiniaasarfiat National Security Agency (NSA) eqqartuussivimmit akuerineqarani inuinnarnik nakkutilliisartoq.
NSA-p nunarsuarmi tamarmi innuttaasut nakkutigisimavai programmi Prism atorlugu, taannalu pinerliiniartartut akiorniarneqarneranni atorneqarpoq.
Amerikarmiu anngiortumik paasissutissanik oqaluttuartoq oqaluttuarsimavoq sunut tamanut isersinnaalluni, ingerlatsivimmi mikinerusumi NSA-mut paasissutissanik pilersuisumi sulilluni kreditkortinut, password-inut e-mail-inullu paasissutissanut isersinnaangami.
Amerikami eqqartuussiveqarpoq isertortumik paasiniaasarfiup nakkutiginninnissamik qinnuteqaataanut aalajangiisartumik, taassumali aalajangiineri tamarmik isertugaasarput.
Snowden-ip paasissutissiinerata kingorna amerikami inatsisartuni politikkikkut tatisisoqalerpoq periutsimi tamatumani saliisoqarnissaanik.
– Amerikarmiunik qanoq annertutigisumik nakkutiginninnissap akuersissutiginissaa oqallisigisinnaanngilarput, isertortumik inatsit tamanna unitsitsinnagu, senatori demokratiusoq Jeff Merkley oqarpoq.
Snowden paasissutissiinermi kingorna toqqorsimavoq. Kingullermik Hongkong-imiissimanerarneqarpoq.