Facebookimi atugaasalersoq akiligassiissutaasinnaavoq
Innuttaasut arlallit sanalukkaminnik pigisaminilluunniit nittartakkani attaveqatigiiffiusuni tuniniaanialertillutik tombolartitsineq atugarineruleriartorpaat. Kalaallit Nunaata Politiivisa periuseq maanna mianersuuteqqulerpaat.
Normumik makitsissutissamik 65 koruunilerlugu pisigit, umimmaallu qiviuinik qilattakkamik pinnannissamut periarfissaqalerlutit. Imaluunniit normumik makitsissutissamik 30 koruunilerlugu pisigit, pooqattamillu pinnannissamut periarfissaqalerlutit.
Nittartakkami attaveqatigiiffiusumi, Facebookimi tuniniaanerit taama ittut piffissami kingullermi takussaapput.
Kalaallit Nunaata Politiivi ilisimatitsipput innuttaasut suliffeqarfiillu taama iliornerup ilumut inatsisinik unioqqutitsinerunnginnersut paasiniaallutik politiinut saaffiginnittalersimasut. Kalaallit Nunaata Politiivini allattoqarfimmi pisortaq, Emil Maegaard-Hoffmann Sermitsiaq.AG-mut taama ilisimatitsivoq.
- Saaffiginnittoqarnikuuvoq, taakkulu misissorneqarput inatsisinik unioqqutitsisimanersut, allattoqarfimmi pisortaq ilisimatitsivoq.
Taamali eqquiniaatitsineq ajunngitsuliornermi imaluunniit amerlasuut soqutigisaannut tunngasunut taamaallaat atorsinnaavoq. Inuit ataasiakkaat namminneq aningaasannanniutigalugu eqquiniiatitsisinnaanngillat.
Kalaallit Nunaata Politiivi Facebookiminni taama ilisimatitsipput.
- Tamanut ammasumik eqquiniaasitsinerit (radiokkut bingortitsinerit, qititsitsinerit, isiginnaartitsinerit aaqqissuussalluunniit allat peqataasunit ass. eqqugassaqarfiusut) politiinit akuerineqassapput. Tassa imaappoq taamaattunik aaqqissuinissamut politiinit akuersissummik pisimatinnani ingerlanneqarsinnaanngillat, politiit allapput.
Katersuiniarneq imaluunniit eqquiniaasitsineq akuerisaavoq:
- Ajunngitsuliornermut siunertaqarpat (Neriuffimmut, Røde Korsimut assigisaannulluunniit ajunngitsuliornermut) imaluunniit
- Inuit amerlanerit soqutigisaannut tunngappat (meeqqat atuartut angalanissaannut, oqaluffiup iluarsartuunnissaanut assigisaannulluunniit)
Akiligassiissutaasinnaasoq
Kalaallit Nunaata Politiivi nassuiaapput peqatigiiffiit komitéellu kisimik eqquiniaatitsilluni katersuiniarnissamut kisimik akuerisaasinnaasut.
- Taamaammat lottortitsinernik assigisaanilluunniit, aningaasat inunnut ataasiakkaanut suliffeqarfinnulluunniit iluanaarutaasussanngorlugit, akuerisaanngillat.
Kalaallit Nunaata Politiivisa erseqqissarpaat tamanut ammasumik katersuiniarnerit aammalu eqquiniaasitsinerit pillugit maleruagassanik unioqqutitsineq akiligassinneqarnermik kinguneqarsinnaasoq.