Facebookimi navianartoq
Assigiinnarpaa Ruslandimi pinerlunniaqatigiinnut qarasaasiaq tunniukkaanni. Qarasaasialerinermik ilisimasartuut Facebook mianersoqqussutigaat.
Europap kangiani pinerlunniaqatigiit taanna aqqutigalugu mailerpassuarnik nassiussuipput. Facebookimi atuisut ilaat qarasaasiamini virusimik isertitsiguni assiginnarpaa Ruslandimi pinerlunniaqatigiinnut qarasaasiani tunniukkuniuk.
Tamanna erserpoq RÚV-mi (Islandimi naalagaaffiup tv-qarfiani) qarasaasianik ilisimasartuup Fridrik Skúlasonip oqaloqatigineqarnerani.
Tassani Facebook eqqartorneqarpoq ulluinnarni islandimiorpassuit atortagaat. Fridriup oqaatigaa inuit kanngutsajuitsut Facebookimi atuisunut allallutik isissutissartik allanngortissagaat piumaffigaat. Taamaaliornerlu ajorluinnartumik kinguneqarsinnaavoq. Facebookimik atuisut taamaalioqquneqarnertik naalakkunikku virusi qarasaasiaminnut isertissavaat. Taava ajorluinnartumik pisoqarsinnaavoq.