Facebookimi virusit ingerlaarput

Virusi Facebookkikkut Messengerikkut ingerlaartinneqaleruttorpoq.

Peter Kruse, suliffeqarfimmi CSIS Security Groupimi IT-mik immikkut ilisimasallik naapertorlugu, virusi aserorsaataasoq tuusintilippassuarnik maannamut eqquisimasinnaasoq sapaatiummat paasivaa.

- Qanoq amerlatigisut eqqugaasimassanersut eqqoriaruminaappoq, ilarpassuisa eqqugaasimanertik arajutsisimasinnaagamikku. 10.000-iusinnaapput 100.000-iullutilluunniit, Danmarkimiinnarli ikinnerpaamik 1.000-it eqqugaapput, immikkut ilisimasalik oqarpoq.

Peter Kruse naapertorlugu virusi kinaassutsinik tiguaaneq ajorpoq. Pilerisaarutinulli arlalinnut ingerlatitseqqiisarpoq virusimillu ingerlaartitsisut taamaaliornikkut aningaasarsiortillugit.

Nittartakkanik allanik aamma ammaasinnaavoq. Aamma eqqugaasut qarasaasiaannut virusinik annertunerujussuarmik ajornartorsiortitsisinnaasunik ikkussuisinnaalluni.

Virusi Vikin-imik taaguuteqarpoq Facebookikkullu ikkussatigut Messengerikkullu allatatigut siaruaatsinneqarpoq. Ikinngutip ilisarisimasalluunniit video takusassiaq ingerlaqqiffissaq aqqutigalugu virusi ingerlaartinneqarpoq.

Ingerlaqqiffissarlu taanna tooraanni, nittartagaq YouTubemut assingusoq iserfigineqassaaq, tassanilu allassimavoq video isiginnaarusukkaanni plug-ini installererneqassasoq. Taamaalioraannilu virusi installererneqassaaq Facebookimilu ikinngutigisanut nassiussuilerluni.

Taamaammat plug-insit ilisimasanit nassiunneqartut kisiisa installertarnissaat eqqumaffigineqartariaqarpoq. Taamaalisoorsimagaannili installerigaq peerneqassaaq, browseri qamissinnarlugu ikeqqillugu kiisalu Facebookimut isissutissaq allanngortillugu.

Virusip internettikkut ingerlaarnera nalunaaquttap akunnerini ulluniluunniit arlalinni pisinnaasoq, Peter Kruse isumaqarpoq.

Taanna naapertorlugu virusit aserorsaataasut Facebookikkut ingerlaartinneqartut kingullersarinngilluinnarpaat, inuimmi attaveqaqatigiittarfiat taanna, assersuutigalugu mailinut sanilliullugu tatiginartinneruarput.

- Facebookkip virusinik aserorsaataasunik siammarterinissamut periarfissatsialaanera pinerlunniat paasisimavaat, taamatullu atornerluinerat ajoraluartumik siunissami takussaanerulissaaq, taanna oqarpoq.